14262 ابن عباس (رض) سے مروی ہے کہ ایک دن میں حضرت عمر بن خطاب (رض) کے پاس بیٹھا ہوا تھا اچانک آپ نے (ایسا دکھ بھرا) سانس لیا میں سمجھا شاید آپ کی پسلیاں چٹک گئی ہیں۔ میں نے عرض کیا : یا امیر المومنین ! یہ سانس کسی دکھ نے ہی نکالا ہے، فرمایا : اللہ کی قسم ! بڑا دکھ ہے۔ مجھے نہیں معلوم ہورہا کہ اپنے بعد یہ منصب خلافت کس کو سونپ کر جاؤں۔ پھر آپ (رض) نے میری طرف متوجہ ہو کر فرمایا : شاید تو اپنے ساتھی کو اس کا اہل سمجھتا ہے۔ میں نے عرض کیا : وہ تو واقعی اس کا اہل ہے۔ اس کی مسابقت فی الاسلام اور فضیلت کی وجہ سے۔ حضرت عمر (رض) نے فرمایا : وہ ایسا ہی ہے جیسا تم نے کہا لیکن اس آدمی میں کچھ مزاج (والی طبیعت) ہے۔ میں نے پوچھا : پھر آپ کا طلحہ کے بارے میں کیا خیال ہے ؟ ارشاد فرمایا : وہ ایسا آدمی ہے جس میں کچھ بڑائی ہے، جب سی اس کی انگلی کو (جنگ میں) نقصان پہنچا ہے۔ میں نے پوچھا : پھر آپ زبیر کو کیوں بھول رہے ہیں ؟ ارشاد فرمایا : ان میں کچھ درشت روئی اور بد خلقی ہے، ایک صاع پر وہ بقیع میں تھپڑ مار دیتے ہیں، اگر ان کو ان کا ایک کھجور صاع دینے سے انکار کردیا جائے تو وہ تلوار اٹھالیتے ہیں۔ میں نے پوچھا : پھر سعد کہاں گئے ؟ فرمایا : وہ تو شہسواروں کے شہسوار ہیں۔ میں نے پوچھا : پھر آپ سے عبدالرحمن کہاں رہ گئے ؟ ارشاد فرمایا : بہترین آدمی ہیں ، لیکن تم نے ان کے بڑھاپے میں ان کا ذکر کیا ہے۔ میں نے پوچھا : پھر عثمان بن عفان کہاں گئے ؟ ارشاد فرمایا : وہ اپنے رشتہ داروں کے مکلف ہوگئے ہیں اللہ کی قسم اگر میں نے ان کو والی بنادیا تو وہ بنی ابی معیط کو لوگوں کی گردنوں پر مسلط کردیں گے۔ اللہ کی قسم اگر میں نے ان کو والی بنایا تو وہ ضرور ایسا کریں گے اور اگر وہ ایسا کریں تو عرب ضرور ان کو قتل کردیں گے۔ یہ منصب تو صرف ایسے شخص کو زیبا ہے جو شدید ہو لیکن سختی سے کام نہ لے، نرمی سے کام لے مگر کمزور نہ ہو، سخی ہو لیکن اسراف نہ کرے، مال روکنے والا ہو لیکن بخل نہ کرے۔ حضرت ابن عباس فرمایا کرتے تھے یہ تمام صفات صرف حضرت عمر (رض) میں جمع ہوئی تھیں۔
ابوعبید فی الغریب، الخطیب فی رواۃ مالک