14274 ابن مسعود (رض) سے مروی ہے کہ میں حضور اکرم (صلی اللہ علیہ وآلہ وسلم) کی خدمت میں حاضر ہوا۔ آپ (صلی اللہ علیہ وآلہ وسلم) کے پاس ابوبکر، عمر اور عثمان (رض) تھے۔ آپ ان کے ساتھ یکسو ہو کر مصروف گفتگو تھے۔ میں نے آپ کو سلام کیا مگر آپ نے مجھے جواب نہیں دیا۔ میں کھڑا ہو کر انتظار کرتا رہا کہ ان سے فارغ ہوں اور تنہا ہوں۔ مجھے ڈر تھا کہ کہیں میں ان کی گفتگو میں خلل انداز نہ ہوجاؤں۔ پھر حضور اکرم (صلی اللہ علیہ وآلہ وسلم) نے حضرت ابوبکر (رض) کے ساتھ طویل سرگوشی فرمائی، پھر وہ نکل کر چلے گئے پھر آپ (صلی اللہ علیہ وآلہ وسلم) نے حضرت عمر (رض) کے ساتھ سرگوشی فرمائی اور وہ بھی نکل کر چلے گئے۔ پھر عثمان (رض) کے ساتھ ساتھ سرگوشی کی اور وہ بھی نکل کر چلے گئے۔ پھر میں حضور (صلی اللہ علیہ وآلہ وسلم) کی طرف متوجہ ہوا استغفار کرتا ہوا اور آپ سے معذرت کرتا ہوا۔ میں نے عرض کیا : میں نے آپ کو سلام کیا تھا مگر آپ نے جواب نہیں دیا۔ حضور اکرم (صلی اللہ علیہ وآلہ وسلم) نے فرمایا : تم سے مجھے ان لوگوں نے مشغول کررکھا تھا۔ میں نے عرض کیا : کس چیز میں ؟ حضور اکرم (صلی اللہ علیہ وآلہ وسلم) نے فرمایا : میں نے ابوبکر کو بتایا تھا کہ وہ میرے بعد (امیر) ہوں گے اور میں نے ان کو نصیحت کی تھی دیکھ لینا کہ کیسے اس کو نبہاؤ گے، انھوں نے کہا : کہ اللہ ہی قوت دے گا، میرے لیے اللہ سے دعا کردیں۔ وہ میں نے کردی۔ اور اللہ ہی ان کی مدد کرے گا۔ پھر میں نے عمرکو یہی بات کی (کہ ان کے بعد وہ امیر ہوں گے) انھوں نے کہا : اللہ کی قوت کے بغیر کچھ ممکن نہیں، مجھے اللہ ہی کافی ہے اور اللہ ہی اس کو کافی ہے۔ پھر میں نے عثمان کو اسی طرح کہا (کہ عمر کے بعد تم امیر ہوگے) اور تم قتل بھی کیے جاؤ گے انھوں نے جواب دیا : اللہ ہی کے ساتھ قوت ہے، آپ میرے لیے شہادت کی دعا کردیں۔ میں نے ان کو کہا : اگر تم صبر کرو گے اور پریشانی کا اظہار نہیں کرو گے تب، انھوں نے کہا : میں صبر کروں گا اور اللہ نے ان کے لیے جنت واجب کردی ہے اور وہ شہید ہوں گے حضرت ابن مسعود (رض) فرماتے ہیں : چنانچہ جب عثمان کی خلافت آئی تو ہم نے ان کو خلافت کی بلندی تک لے جانے میں کوئی کوتاہی نہیں برتی۔ سیف، ابن عساکر