14286 حضرت علی (رض) سے مروی ہے ارشاد فرمایا :
لوگوں (کے حالات) کو صرف امیر وقت درست کرسکتا ہے خواہ وہ نیک ہو یا بد۔
لوگوں نے پوچھا : یا امیر المومنین ! نیک تو درست ہے فاجر کے ذریعے کیسے حالات درست ہوں گے ؟ حضرت علی (رض) نے ارشاد فرمایا : فاجر کے ذریعے اللہ پاک راستوں کو پر امن بنادیتا ہے، اس کے ساتھ دشمن سے جنگ کی جاتی ہے، اس کے واسطے سے مال غنیمت کا حصول ہوتا ہے، اس کے حکم پر حدود اللہ کا نفاذ ہوتا ہے، اس کی سربراہی میں بیت اللہ کا حج کیا جاتا ہے اور اس کی وجہ سے مسلمان امن کے ساتھ اللہ کی عبادت کرتا ہے حتیٰ کہ اس کی موت آجاتی ہے۔ خواہ اس کے اپنے کردار کیسے ہوں مگر وہ پھر بھی لوگوں کے لیے باعث امن ہوتا ہے۔ شعب الایمان للبیہقی