14339 حضرت عروہ بن رویم (رح) سے مروی ہے کہ حضرت عمر بن خطاب (رض) لوگوں سے حال احوال دریافت فرمایا کرتے تھے۔ اہل حمص ان کے پاس سے گزرے تو آپ (رض) نے پوچھا : تمہارا امیر کیسا ہے ؟
لوگوں نے کہا : اچھا امیر ہے مگر انھوں نے ایک بالاخانہ بنالیا ہے جس میں وہ رہتے ہیں۔ حضرت عمر (رض) نے ایک خط لکھا اور قاصد کے ہاتھوں اس کو اس عامل کے پاس روانہ کردیا اور اس کو حکم دیا کہ اس امیر کا بالا خانہ جلادے۔ چنانچہ قاصد عامل (امیر) کے پاس پہنچا اور لکڑیاں جمع کیں اور اس کے دروازے کو جلا دیا پھر امیر کو خبر کی گئی تو امیر نے کہا : اس کو چھوڑ دو کیونکہ وہ قاصد ہے۔ پھر قاصد نے آکر امیر کو امیر المومنین کا خط تھمادیا۔ امیر نے خط کو پڑھ کر رکھا بھی نہیں تھا کہ اس نے سواری پر سوار ہو کر ایڑ لگادی حضرت عمر (رض) نے اس کو دیکھا تو فرمایا : مجھے حرۃ۔ پہاڑی مقام پر ملو۔ وہاں صدقے کے اونٹ تھے۔ آپ (رض) نے وہاں امیر کو فرمایا : اپنے کپڑے اتارو۔ پھر اس کی طرف ایک لنگی (تہبند) پھینکی جو اونٹوں کے بالوں سے بنی ہوئی تھی۔ پھر ارشاد فرمایا : اس کو باندھ لو اور اونٹوں کو پانی پلاؤ۔ چنانچہ وہ امیر پانی نکال نکال کر اونٹوں کو پلاتا رہا حتیٰ کہ وہ تھک گیا۔ پھر دریافت فرمایا : تم کب سے اس عہدہ امارت (گورنری) پر فائز ہو ؟ اس نے عرض کیا : قریب سے ہے امیر المومنین ! حضرت عمر (رض) نے ارشاد فرمایا : اسی وجہ سے بالا خانہ بنوالیا اور اس میں بیٹھ کر مسکین ، فقیر اور یتیم سے بلند ہو کر بیٹھ گئے۔ بس اب تم اپنے پہلے کام پر چلے جاؤ اور امارت چھوڑ دو ۔ ابن عساکر