14383 ابومالک الاشعری (رض) سے مروی ہے وہ فرماتے ہیں کہ ہمیں رسول اکرم (صلی اللہ علیہ وآلہ وسلم) نے ایک لشکر کے ساتھ روانہ فرمایا ۔ حضرت سعد بن ابی وقاص (رض) کو ہمارا امیر لشکرمقرر فرمایا۔ ہم روانہ ہوگئے اور ایک مقام پر جاکر لشکر نے پڑاؤ کیا۔ ایک آدمی لشکر میں سے اٹھا اور اپنے سواری کے جانور کی زین کسنے لگا۔ میں نے اس سے پوچھا : کہاں جانے کا ارادہ رکھتے ہو ؟ اس نے جواب دیا کہ میں سواری کو چرانے کے لیے لے جارہا ہوں۔ میں نے اس کو کہا : اپنے امیر سے اجازت لیے بغیر ہرگز نہ جاؤ، چنانچہ ہم دونوں حضرت ابوموسیٰ اشعری (رض) کے پاس حاضر ہوئے اور ان کو یہ بات ذکر کی۔ حضرت ابو موسیٰ (رض) نے اس آدمی سے پوچھا : کیا تم واپس اپنے گھر جانے کا ارادہ رکھتے ہو ؟ لیکن اس نے انکار کردیا کہ نہیں۔ حضرت ابوموسیٰ (رض) نے فرمایا : دیکھ لو کیا کہہ رہے ہو ؟ آدمی نے جواب دیا : نہیں، (ایسا کچھ نہیں ہے) ۔ تب حضرت ابوموسیٰ (رض) نے فرمایا : خیر کے ساتھ سیدھی راہ جاؤ۔ چنانچہ وہ شخص رات کے کچھ پہر تک غائب رہا، پھر آگیا۔ حضرت ابوموسیٰ (رض) نے اس سے پوچھا : شاید تو اپنی اہلیہ کے پاس گیا تھا ؟ آدمی نے انکار کیا۔ حضرت ابوموسیٰ (رض) نے فرمایا : دیکھ لو کیا کہہ رہے ہو ؟ تب آدمی نے جواب دیا کہ ہاں ایسا ہی ہے۔ حضرت ابوموسیٰ (رض) نے فرمایا : تب تو جہنم میں سے ہو کر اپنے گھر والوں کے پاس گیا تھا اور جہنم میں بیٹھا رہا اور جہنم ہی میں گیا اور جہنم سے ہی واپس آیا۔ ابن عساکر