14385 حضرت ابوذر (رض) سے مروی ہے وہ فرماتے ہیں : میں رسول اکرم (صلی اللہ علیہ وآلہ وسلم) کی خدمت کیا کرتا تھا جب فارغ ہوتا تو مسجد میں آکر آرام کرلیتا تھا۔ پس ایک دن رسول اکرم (صلی اللہ علیہ وآلہ وسلم) میرے پاس تشریف لائے ۔ میں مسجد میں لیٹا ہوا تھا۔ آپ (صلی اللہ علیہ وآلہ وسلم) نے مجھے پاؤں کے ساتھ کچوکا لگایا۔ چنانچہ میں سیدھا ہو کر بیٹھ گیا۔ آپ (صلی اللہ علیہ وآلہ وسلم) نے مجھ سے پوچھا : جب تجھے یہاں سے نکالا جائے گا تب تو کیا کرے گا ؟ میں نے عرض کیا : کیا مسجد رسول اللہ (صلی اللہ علیہ وآلہ وسلم) سے ؟ حضور (صلی اللہ علیہ وآلہ وسلم) نے فرمایا : ہاں۔ میں نے عرض کیا : میں سرزمین انبیاء میں چلا جاؤں گا۔ حضور (صلی اللہ علیہ وآلہ وسلم) نے فرمایا : جب وہاں سے تجھے نکالا جائے گا تب کیا کرے گا ؟ میں نے عرض کیا : تب میں اس شخص کے خلاف تلوار سونت لوں گا جو مجھے وہاں سے نکالے ۔ آپ (صلی اللہ علیہ وآلہ وسلم) نے اپنا ہاتھ میرے شانے پر مارا اور ارشاد فرمایا : اللہ تیری مغفرت کرے اے ابوذر ! وہ تجھے جہاں ہانکیں تو چلا جانا۔ اور جہاں تجھے وہ کھینچیں کھنچ جانا خواہ تیرا امیر کوئی حبشی غلام ہو۔
حضرت ابوذر (رض) فرماتے ہیں : چنانچہ جب مجھے مدینے سے مقام ربذۃ میں جلاء وطن کیا گیا اور وہاں نماز کھڑی ہوئی تو امامت کے لیے ایک حبشی غلام جو وہاں کا (صدقات وغیرہ پر عامل اور) امیر تھا، آگے بڑھا۔ لیکن جب اس کی مجھ پر نظر پڑی تو واپس ہونے لگا اور اس نے مجھے آگے بڑھانے کی کوشش کی۔ میں نے کہا : تو اپنی جگہ امامت کر، میں رسول اکرم (صلی اللہ علیہ وآلہ وسلم) کے حکم کی وجہ سے تیری اقتداء کروں گا۔ ابن جریر