14567 حضرت تمیم الداری (رض) سے مروی ہے کہ رسول اللہ (صلی اللہ علیہ وآلہ وسلم) نے ارشاد فرمایا : جو پانچ چیزیں لے کر اللہ تعالیٰ سے ملاقات کرے اس کے لیے جنت ہے اور جس نے پانچ چیزوں کی ادائیگی کے ساتھ اللہ تعالیٰ سے ملاقات کی اس کو جنت سے کوئی چیز روکنے والی نہیں۔ اور جمعہ پانچ شخصوں کے سوا سب پر واجب ہے۔ وضو پانچ چیزوں سے ٹوٹ جاتا ہے، مشروبات پانچ سے تیار ہوتے ہیں، عورتوں پر مردوں کے پانچ حق ہیں اور حضور (صلی اللہ علیہ وآلہ وسلم) نے عورتوں کو پانچ چیزوں سے منع فرمایا :
بہرحال وہ پانچ چیزیں جن کے ساتھ بندہ اللہ سے ملاقات کرے اور اس کے لیے جنت ہوجائے وہ نماز، زکوۃ ، بیت اللہ کا حج، رمضان کے روزے اور امیر کی اطاعت ہے اور خالق کی نافرمانی میں کسی مخلوق کی اطاعت نہیں۔
بہرحال وہ پانچ چیزیں جن کی ادائیگی کرتے ہوئے اللہ سے ملاقات کرے تو اس کو جنت سے کوئی چیز نہیں روک سکتی وہ اللہ کی خیر خواہی، کتاب اللہ کی خیر خواہی ، امیروں (حکام) کی خیر خواہی اور عامۃ المسلمین کی خیر خواہی ہے۔
بہرحال جمعہ ان پانچ لوگوں کے سوا سب پر واجب ہے : عورت، مریض، غلام، مسافر اور بچہ۔
بہرحال وضو پانچ چیزوں سے ٹوٹ جاتا ہے۔ اور کرنا واجب ہوجاتا ہے ہوا نکلنے سے، پاخانے سے، پیشاب سے، قے (الٹی) سے اور ٹپکنے والے خون سے۔
بہرحال مشروب (نبیذ وغیرہ) پانچ چیزوں سے تیار ہوتے ہیں۔ شہد سے، کشمش سے، کھجوری سے، گندم سے اور جو سے۔
بہرحال آدمی کے عورتوں پر پانچ حق ہیں : اس کی قسم (اگر وہ عورت کے لیے کوئی قسم کھالے تو اس کو) نہ تڑوائے، خوشبونہ لگائے مگر شوہر ہی کے لئے، گھر سے نہ نکلے مگر اس کی اجازت کے ساتھ اور اس کے گھر میں ایسے شخص کو نہ آنے دے جس کا آنا وہ پسند نہ کرتا ہو۔
اور بہرحال حضور اکرم (صلی اللہ علیہ وآلہ وسلم) نے عورتوں کو پانچ باتوں سے منع فرمایا : (کمام سے یعنی بالوں کے اندر کوئی چیز رکھ کر ان کا) جوڑا بنانے سے۔ جس سے بال زیادہ معلوم ہوں، جوتے پہننے سے (یعنی گھومنے پھرنے سے) ، محفلوں میں بیٹھنے سے، شاخ۔ ڈنڈی وغیرہ لے کر اکڑتے ہوئے چلنے اور بغیر اوڑھنی کے صرف شلوار قمیص پر اکتفاء کرنے سے ۔ ابن عساکر
کلام : روایت بالاسند کے اعتبار سے محل کلام ہے دیکھئے : التنزیہ 395/2 ذیل اللالی 182