١٤٦٠۔۔ اسامہ بن زید سے مروی ہے کہ فرمایا ہمیں رسول اللہ نے ایک سریہ میں بھیجا ہم نے صبح کے وقت قبیلہ جہینہ کی ایک شاخ حرقات پر حملہ کیا۔ میں نے ایک شخص کو جالیا اس نے لاالہ الا اللہ کہا مگر میں نے اس کو نیزہ مار دیا، لیکن پھر میرے دل میں اس سے خلجان پیدا ہوا اور میں نے اس کا ذکر رسول اللہ سے کیا آپ نے فرمایا اس نے لاالہ الا اللہ کہا اس کے باوجود تم نے اس کو قتل کرڈالا ؟ میں نے عرض کیا یارسول اللہ اس نے اسلحہ کے خوف سے وہ کہا تھا، آپ نے فرمایا پھر تم نے اس کا سینہ چیر کر کیوں نہ دیکھا تاکہ تمہیں علم ہوجاتا کہ اس نے اس خوف سے کلمہ کہا تھا یا نہیں ؟ تمہارا کون حامی ہوگا، جب قیامت کے روز، لاالہ الا اللہ ، آئے گا، ؟ آپ اس کو بار بار دھراتے رہے، حتی کہ میرے دل میں تمنا پیدا ہوئی کہ کاش میں اسی دن اسلام قبول کرتا۔ الاوسط للطبرانی، مسنداحمد، بخاری، مسلم، العدنی، ابی داؤد، النسائی، ابوعوانہ، طحاوی، ابن حبان، المستدرک للحاکم۔ بخاری و مسلم۔
کاش میں اسی دن اسلام قبول کرتا اس قول کی وجہ یہ پیش آئی کہ اسی دن اسلام قبول کرنے سے میرا یہ فعل معاف ہوجاتا کیونکہ اسلام تمام گناہوں کو دھو دیتا ہے یا یہ مطلب کہ میں اس سے قبل اسلام کی حالت میں نہ ہوتا، بلکہ اسی دن اسلام قبول کرتا اور اس طرح مسلمان نہ ہونے کی وجہ سے جنگ میں شرکت ہوتی اور نہ یہ مجھ سے قتل سرزد ہوتا۔