١٥٣٩۔۔ محمد بن عکاشہ الکرمانی (رح) فرماتے ہیں کہ اللہ کی قسم ہمیں عبدالرزاق نے خبر دی وہ کہتے ہیں اللہ کی قسم ہمیں سلمہ نے خبر دی وہ کہتے ہیں اللہ کی قسم ! ہمیں عبداللہ بن کعب نے خبر دی ۔ وہ کہتے ہیں کہ اللہ کی قسم ہمیں عبداللہ بن عباس نے خبر دی وہ کہتے ہیں کہ اللہ کی قسم ہم سے علی بن ابی طالب نے بیان کیا وہ کہتے ہیں کہ اللہ کی قسم ہمیں حضرت ابوبکر صدیق نے خبر دی وہ فرماتے ہیں کہ اللہ کی قسم میں نے اپنے محبوب محمد (صلی اللہ علیہ وآلہ وسلم) سے سنا، اور آپ نے فرمایا اللہ کی قسم میں نے جبرائیل امین (علیہ السلام) سے سنا وہ کہتے ہیں کہ اللہ کی قسم میں نے میکائیل (علیہ السلام) سے سنا وہ کہتے ہیں کہ اللہ کی قسم میں نے اسرافیل سے سنا وہ کہتے ہیں کہ اللہ کی قسم میں نے لوح محفوظ سے سنا لوح محفوظ کہتا ہے کہ اللہ کی قسم میں نے قلم سے سنا، قلم کہتا ہے اللہ کی قسم میں نے اللہ تعالیٰ کو فرماتے ہوئے سنا بیشک میں اللہ ہوں میرے سوا کوئی پرستش کے لائق نہیں ۔۔۔ جو مجھ پر ایمان لایا لیکن اچھی اور بری تقدیر پر ایمان نہ لایا تو وہ میرے سوا کوئی اور پروردگار تلاش کرلے میں اس کا پروردگار نہیں ہوں۔ الحافظ، ابوالحسین ، علی بن الفضل المقدسی فی مسلسلاتہ۔
اس روایت میں محمد بن عکاشہ کذاب راوی ہیں۔ ابوالقاسم محمد بن عبدالواحد نے اس روایت کو اپنے اس رسالہ میں ذکر کیا جس کی احادیث کی اسناد میں چار چار صحابہ کرام راوی ہیں۔ اور عقبہ (رح) فرماتے ہیں کہ محدث ابوالقاسم بن بشکوال نے فرمایا کہ اس حدیث شریف کی اسناد میں چار صحابہ کرام موجود ہیں اور وہ ابوبکر ، علی، ابن عباس ، اور عبداللہ بن کعب بن مالک (رض) کی صحابیت میں اختلاف ہے لیکن ہمارے نزدیک ان کی صحابیت تسلیم ہے۔ تو اس طرح یہ روایت کے چار صحابہ میں سے چوتھے صحابی شمار ہوں گے اور اس طرح کی اسناد نادرالوجود ہیں۔