١٥٤٣۔۔ از مسند عمر (رض)۔ یحییٰ بن یعمر فرماتے ہیں کہ سب سے پہلے تقدیر کے متعلق بصرہ میں جس نے بحث آرائی کی وہ معبدالجہنی تھا تو میں حمید بن عبدالرحمن کے ہمراہ نکلا ہمارا ارادہ حج یاعمرہ کا تھا۔ ہم نے کہا کاش اگر کوئی صاحب رسول مل جائے تو ہم ان سے تقدیر کے متعلق بحث کرنے والوں کے بارے میں سوال کریں تو اتفاق سے ہمارا سامنا حضرت عبداللہ بن عمر سے ہوگیا آپ (رض) مسجد میں داخل ہورہے تھے کہ ہم نے آپ کو جالیا، ہم میں سے ایک آپ کی دائیں جانب اور دوسرا بائیں جانب ہوگیا میرا غالب خیال یہی تھیا کہ میرا ساتھی گفتگو کرنے کا موقع مجھے دے گا لہٰذا میں نے آپ سے کہا اے ابوعبدالرحمن ہمارے دیار میں چند ایسے لوگ سرابھار رہے ہیں جو قران کی تلاوت کرتے ہیں اور علم کی باتیں کرتے ہیں پھر اور بھی ان کے کچھ حالات گنوادیے نیز یہ کہ ان کا خیال ہے کہ تقدیر کوئی وجود نہیں بلکہ ہر کام ازسرنوانجام پاتا ہے۔
حضرت عبداللہ بن عمر نے فرمایا جب تمہاری ان سے ملاقات ہو تو ان کو یہ خبر دے دینا کہ میرا ان سے کوئی واسطہ نہیں میں ان سے بری وروہ مجھ سے بری ہیں اور قسم ہے اس ہستی کی کہ عبداللہ بن عمر جس کی قسم اٹھایا کرتا ہے کہ اگر ان میں سے کوئی شخص احد پہاڑ برابر سونے کا مالک ہو اور وہ اس کو اللہ کی راہ میں خرچ کرڈالے ۔۔ تب بھی وہ اس کی جانب سے اس وقت تک ہرگز شرف قبولیت کو نہ پہنچے گا جب تک وہ تقدیر پر ایمان نہ لائے۔ اس کے بعد حضرت عبداللہ بن عمر نے مجھے بیان کیا کہ میرے والد عمر بن خطاب نے مجھے بیان کیا کہ ہم رسول اللہ کے پاس حاضرمجلس تھے کہ ایک ایساشخص ہمارے پاس آیا اس کے کپڑے انتہائی سفید اور بال گھنے سیال تھے اس کے جسم پر آثار سفر نہ تھے اور ہم میں سے کوئی شخص بھی ان کو پہچانتا نہ تھا وہ اس قدر نبی کریم کے قریب آکر بیٹھا کہ اپنے گھٹنے آپ کے گھٹنوں کے ساتھ ملادیے۔ اور آپ کی رانوں پر اپنے ہاتھ رکھ دیے پھر کہنے لگا کہ اے محمد مجھے اسلام کے بارے میں خبر دیجئے آپ نے فرمایا یہ کہ تم لاالہ الا اللہ محمد رسول اللہ کی شہادت دو نماز قائم کرو، زکوۃ ادا کرو، ماہ صیام کے روزے رکھواگرجانے کی استطاعت ہو تو بیت اللہ کا حج کرو، اس نے کہا آپ نے سچ فرمایا ہمیں اس کی بات سے تعجب ہوا کہ سوال کرتا ہے اور پھر خود ہی اس کی تصڈیق کرتا ہے پھر استفسار کیا مجھے خبر دیجئے کہ ایمان کیا ہے فرمایا ایمان یہ ہے کہ تم اللہ پر ملائکہ پر اس کی کتابوں پر اس کے رسولوں پر، یوم آخرت پر ایمان لاؤ، اور ہر بھلی وبری تقدیر پر ایمان لاؤ کہا آپ نے سچ فرمایا، پھر استفسار کیا احسان کیا ہے فرمایا یہ کہ تم اللہ کی یوں عبادت کروگویا اسے دیکھ رہے ہو۔۔ ورنہ وہ تمہیں دیکھ ہی رہا ہے پھر کہا مجھے قیامت کے متعلق خبر دیجئے کہ کب واقع ہوگی ؟ فرمایا س بارے میں مسوئل سائل سے زیادہ علم نہیں رکھتا، پھر کہا اچھا مجھے اس کی علامات کے متعلق خبر دیجئے فرمایا یہ کہ باندی اپنی مالکہ کو جنم دینے لگے اور عمارتیں فلک بوس ہونے لگیں ، پھر وہ سائل شخص چلا گیا پھر میں کچھ وقت ٹھہرارہا، پھر آپ نے پوچھا اے عمر جانتے ہو سائل کون تھا عرض کیا اللہ اور س کا رسول بہترجانتے ہیں فرمایا یہ جبرائیل تھے تمہیں تمہارا دین سکھانے آئے تھے۔ ابن ابی شیبہ، مسنداحمد، مسلم، ابی داؤد، ترمذی، النسائی، ابن ماجہ، ابن جریر، ابن خزیمہ، ابوعوانہ، صحح ابن حبان، ق فی الدلائل۔
ابن خزیمہ اور ابن حبان کی روایت میں یہ الفاظ ہیں کہ تم نماز قائم کرو، زکوۃ اد اکرو، حج وعمرہ کرو، غسل پاکی کرو، اور وضوء کو تام کرو اور ماہ صیام کے روزے رکھو، اور ابن حبان میں اس بات کا اضافہ ہے لیکن اگر تم چاہوتو میں تم کو اس کی علامات کی خبردے دیتاہوں وہ یہ کہ جب تم دیکھو کہ فقیر لوگ ، ننگے پاؤں والے ننگے جسموں والے لمبی لمبی عمارتوں کے بنانے میں مقابلہ بازی کررہے ہیں اور وہ بادشاہ بن بیٹھے ہیں پوچھا گیا کہ مالعالہ الحفاٹ العراۃ، یعنی یہ فقیر لوگ ننگے پاؤں والے ننگے جسموں والے کون ہیں ؟ فرمایا عرب۔ اور یہ کہ تم باندی کو دیکھو کہ وہ اپنی مالکہ کو جنم دینے لگی ہے تو جان لو کہ یہ قیامت کی علامات ہیں الجامع ترمذی کے الفاظ یہ ہیں پھر نبی کریم مجھ سے تین یوم بعد ملے تو مجھ سے دریافت کیا اے عمرجانتے ہو سائل کون تھا ؟ پھر فرمایا یہ جبرائیل تھے تمہیں تمہارے دین کی بات سکھانے آئے تھے اور بخاری کے الفاظ یہ ہیں اور باندیاں اپنی آقاؤں کو جنم دینے لگیں گی پھر آپ نے فرمایا میرے پاس اس سائل کو تلاش کرکے لاؤ صحابہ کرام اجمعین نے اس کو تلاش کیا لیکن وہاں اس کے کچھ آثار بھی نہ پاسکے۔ پھر آپ ایک دن یادویاتین دنوں تک ٹھہرے رہے پھر پوچھا اے ابن خطاب جانتے ہو وہ سائل کون تھا ؟ پھر آگے وہی تفصیل ہے۔
” باندیاں اپنی آقاؤں کو جنم دینے لگیں گی ، کا مطلب ہے کہ ماں جس اولاد کو جنم دے گی وہ اولاد ماں کی اس قدر نافرمان اور سرکش اور اس پر اپنا حکم چلانے والی ہوگی ، گویا ماں اس کی باندی ہے اور وہ اولاد اس کی آقا ہے۔ گویا ماں نے بیٹے کو کیا جنم دیا، بلکہ اپنے مالک کو جنم دے دیا یہ مطلب ہے کہ باندیاں اپنی آقاؤں کو جنم دینے لگیں گی۔