١٥٥٠۔۔ حضرت عمر بن خطاب سے مروی ہے کہ رسول اکرم نے فرمایا حضرت موسیٰ نے عرض کیا اے پروردگار آدم سے میری ملاقات کرائیے جنہوں نے ہم کو اپنے سمیت جنت سے نکلوایا ؟ تو اللہ نے حضرت آدم سے ان کا سامنا کروادیا، حضرت موسیٰ نے کہا آپ ہی ہمارے باپ آدم ہیں۔ فرمایا جی۔ حضرت موسیٰ نے کہا آپ ہی میں اللہ نے اپنی روح پھونکی اور تمام اسماء کی آپ کو تعلیم دی ؟ اور فرشتوں سے آپ کو سجدہ کرایا، حضرت آدم نے فرمایا جی بالکل۔ حضرت موسیٰ نے کہا پھر کس بات نے آپ کو اس پر اکسایا کہ آپ نے ہم کو بھی اور اپنے آپ کو بھی جنت سے نکلوایا ؟
حضرت آدم نے فرمایا : اور تم کون ہو ؟ کہا میں موسیٰ ہوں۔ فرمایا کیا تم وہی بنی اسرائیل کے پیغمبر ہو جن کو اللہ نے اپنے ساتھ بغیر کسی قاصد کے صرف پردے کے حجاب میں کلام کرنے کا شرف بخشا، حضرت موسیٰ نے کہا جی۔ حضرت آدم نے فرمایا تو کیا تم نے اپنی کتاب میں نہیں پایا کہ یہ فیصلہ تو میری تخلیق سے قبل ہی میرے لیے لکھ دیا گیا تھا ؟ حضرت موسیٰ نے کہا جی ہاں۔ حضرت آدم نے فرمایا توپھرکس بات پر تم مجھے ملامت کرتے ہو کیا ایسی بات پر جس کا فیصلہ مجھ سے پہلے ہوگیا تھا۔ حضور نے اس موقعہ پر فرمایا کہ پس آدم موسیٰ پر غالب آگئے۔ السنن لابی داؤد، ابن ابی عاصم فی السنہ، ابن جریر، ابن خزیمہ، ابوعوانہ، الشاشی، ابن مندہ فی الرد، علی الجھمیہ، الاجری، فی الثمانین، الاصبھانی فی الحجہ، السنن لسعید۔