١٥٥٣۔۔ حضرت علی سے مروی ہے کہ رسول اللہ منبرپرجلوہ افروز ہوئے اور اللہ کی حمدوثنا بیان کی اور فرمایا ایک کتاب ہے جس میں اللہ نے اہل جنت اور ان کے اسماء اور انساب لکھے ہیں اسی پر ان کو جمع کیا جائے گا قیامت تک کبھی بھی اس میں کوئی کمی بیشی نہیں ہوسکتی، پھر فرمایا ایک کتاب اور ہے جس میں اللہ نے اہل جہنم اور ان کے اسماء اور انساب لکھے ہیں اسی پر انکوجمع کیا ۔ صاحب جنت کا خاتمہ اہل جنت ہی کے عمل پر ہوگا اور خواہ وہ کیسے ہی اعمال کرتا رہے ، صاحب جہنم کا خاتمہ اہل جہنم ہی کے عمل پر ہوگا خواہ کیسے ہی وہ اعمال کرے ، کبھی اہل سعادت میں اہل شقاوت کا طریقہ رائج ہوجاتا ہے ۔۔ حتی کہ کہا جانے لگتا ہے کہ یہ لوگ کس بری طرح ان بدبختوں کے ہوبہو ہوگئے ہیں لیکن پھر سعادت ان کو جالیتی ہے اور ان کو اس سے نجات دیتی ہے اور کبھی اہل شقاوت میں اہل سعادت کا طریقہ رائج ہوجاتا ہے حتی کہ کہا جانے لگتا ہے کہ یہ لوگ کس قدر نیک بختوں کے مشابہ ہوگئے ہیں لیکن پھر شقاوت ان کو جالیتی ہے اور ان کو اس سے نکال لاتی ہے جس کے لیے اللہ نے ام الکتاب یعنی لوح محفوظ میں سعید ہونا لکھ دیا ہے ، اس کو اللہ دنیا سے نہیں نکالے گا جب تک اس کو موت سے قبل اہل سعادت کے عمل میں نہ لگادیے۔۔۔ خواہ وہ اس وقت اونٹنی کے دودھ دوہنے کی دودھاروں کے درمیانی وقفہ کے بقدر ہو، اور جس کے لیے اللہ نے ام الکتاب یعنی لوح محفوظ میں شقی ہونا لکھ دیا ہے اس کو اللہ دنیا سے نہیں نکالے گا جب تک کہ اس کو موت سے قبل اہل شقاوت کے عمل میں نہ لگادے۔۔ خواہ وہ وقت اونٹنی کے دودھ دوہنے کی دودھاروں کے درمیانی وقفہ کے بقدر ہو ، پس اعمال کا دارومدار خاتمہ پر ہے۔ الاوسط للطبرانی ابوسھل الجند یسابوری فی الخامس من حدیثہ۔