١٥٦٤۔۔ یعلی بن مرہ سے مروی ہے کہ حضرت علی رات میں مسجد جاکر نوافل ادا کیا کرتے تھے تو ہم آپ کی چوکیداری کی غرض سے حاضر ہوئے جب آپ فارغ ہوئے تو ہمارے پاس تشریف لائے اور فرمایا کس چیز نے تمہیں بٹھا رکھا ہے ؟ ہم نے عرض کیا ہم آپ کی چوکیداری کررہے ہیں، فرمایا کیا آسمان والوں سے میری حفاظت کررہے ہو، یا زمین والوں سے ؟ ہم نے عرض کیا زمین والوں سے ۔ فرمایا زمین میں کوئی شے نقصان رساں نہیں ہوسکتی تاوقتیکہ آسمان پر اس کا فیصلہ نہ کردیا جائے۔ بیشک کوئی انسان ایسا نہیں ہے جس پر دونگہبان فرشتے مقرر نہ ہوں۔ جو اس سے سے ہر مصیبت کو دفع کرتے رہتے ہیں اور ایک دوسرے کو اس کی حفاظت سپرد کرتے رہتے ہیں حتی کہ اس کی تقدیر آجاتی ہے پس جب اس کی تقدیر آجاتی ہے تو وہ فرشتے اس کے اور تقدیر کے درمیان سے ہٹ جاتے ہیں اور اللہ کی طرف سے ایک ڈھال میری حفاظت پر مامور ہے جو میرے لیے قلعہ گاہ ہے سو جب میرا وقت آجائے گا تو مجھ سے یہ حفاظت اٹھ جائے گی اور بیشک کوئی شخص ایمان کا مزہ اس وقت تک نہیں چکھ سکتا جب تک وہ اس بات کا یقین نہ کرلے کہ جو چیز اس کو پہنچی وہ ہرگز چوکنے والی نہ تھی اور وہ جو نہیں پہنچی وہ ہرگز پہنچنے والی نہ تھی۔ ابوداؤد فی القدر، خشیش فی الاستقامہ، ابن عساکر۔