١٥٦٧۔۔ محمد بن ادریس الشافعی، یحییٰ بن سلیم سے اور یحییٰ ، جعفر بن محمد سے ، جعفر اپنے والد عبداللہ بن جعفر سے ۔ عبداللہ حضرت علی (رض) بن ابی طالب سے روایت کرتے ہیں کہ ایک مرتبہ حضرت علی نے لوگوں کو خطبہ دیا اور فرمایا، انسان کے اندر عجیب ترین شے اس کا دل ہے جو حکمت و دانائی کا ذخیرہ ہے تو اس کی اضداد کے لیے بھی جائے پناہ ہے۔ اگر اس میں امید کو آسرا ملتا ہے تو طمع اس کو مجبور کردیتی ہے اور اگر طمع بھڑکتی ہے تو حرص اس کو ہلاک کر ڈالتی ہے اور اگر یاس واناامیدی کا ہجوم اس میں گھربساتا ہے توحسرت و افسوس اس کو قتل کیے دیتا ہے اور اگر اس پر غصہ طاری ہوتا ہے تو غضبناکی اس میں بھڑک اٹھتی ہے اور اگر اس کو رضا بالقضاء کی سعادت میسر ہوتی ہے تو یہ اپنی حفاظت سے غافل ہوجاتا ہے اور اگر خوف اس پر مسلط ہوتا ہے تو یہ حزن وملال کی آماجگاہ بن جاتا ہے۔ اگر اس پر کوئی مصیبت نازل ہوتی ہے تو آہ واویلا اس کو کاٹ ڈالتا ہے اگر یہ مال حاصل کرلیتا ہے تو غنی واسراف اس کو سرکشی میں مبتلا کیے دیتے ہیں، اگر اس کو فاقہ کاٹتا ہے تو بلاء و مصیبت اس کو گھیر لیتی ہے اور اگر بھوک اس کو لاچار کرتی ہے توضعف وکسمپرسی اس کو لے بیٹھتی ہے الغرض ہر کمی اس کے لیے مضر ہے اور ہر طرح کی فراوانی اس کے بگاڑ و فساد کا سرچشمہ ہے۔
ایک شخص جو جنگ جمل میں آپ کے ہمراہ کھڑا ہوا اور عرض کیا اے امیرالمومنین ہمیں تقدیر کے متعلق کچھ بتا دیجئے فرمایا یہ اتھاہ گہرا سمندر ہے اس میں مت گھس۔ اس نے پھر اصرار کیا اے امیرالمومنین ہمیں تقدیر کے متعلق کچھ بتا دیجئے فرمایا یہ خدائی راز سے اس کی کلفت میں مت پڑو۔ اس نے پھر اصرار کیا اے امیرالمومنین ، ہمیں تقدیر کے متعلق کچھ بتا دیجئے فرمایا اگر تم نہیں مانتے توسنو کہ یہ دوراہوں کے درمیان ایک راہ ہے جس میں کلی چبر ہے اور نہ مکمل اختیار وتفویض اس نے عرض کیا امیرالمومنین یہاں ایک شخص آپ کے حاضر ہے جس کا خیال ہے کہ ہر شی کا تعلق بندہ کی استطاعت کے ساتھ ہے۔ آپ (رض) نے فرمایا اس کو سامنے لاؤ لوگوں نے اس کو کھڑا کردیا، آپ (رض) نے اپنی تلوار چارانگلیوں کیے برابر نیام سے سونتی اور اس سے دریافت فرمایا، کیا تم اللہ کے ساتھ ہو کر استطاعت رکھنے کا دعوی کرتے ہو یا اللہ کے بغیر استطاعت رکھنے کا دعوی کرتے ہو اور یاد رکھو کسی ایک کے متعلق بھی ہاں کہی تو تم مرتد ہوجاؤ گے اور پھر میں تمہاری گردن اڑادوں گا اس شخص نے عرض کیا اے امیرالمومنین تو پھر میں کیا کہوں ؟ فرمایا کہو کہ میں استطاعت رکھتاہوں اللہ کی مدد سے اگر وہ چاہتا تو مجھے اس کا مالک بنادیتا۔ الحلیہ۔