١٦٢٥۔۔ از مسند عمر (رض)۔ خالد بن عرفطہ، سے مروی ہے کہ میں حضرت عمر (رض) کے پاس بیٹھا ہوا تھا کہ عبدالقیس کے ایک شخص کو آپ کی خدمت میں پیش کیا گیا، حضرت عمر نے اس سے دریافت کیا تم فلاں عبدی ہو ؟ عرض کیا جی ہاں۔ آپ نے لکڑی کے ساتھ اس کو مارا، آدمی نے کہا اے امیرالمومنین میرا کیا قصور ہے فرمایا بیٹھ جاؤ، پھر آپ نے بسم اللہ الرحمن الرحیم پڑھ کر ان آیات کی تلاوت فرمائی۔ الر، تلک آیات الکتاب المبین۔۔ تا۔۔ الغافلین۔ الر یہ کھلی کتاب کی آیات ہیں۔۔
آپ نے ان آیات کی تین بار تلاوت فرمائی ۔ اور تین بار اس شخص کو بھی مارا، اس نے کہا اے امیرالمومنین میرا کیا قصور ہے ؟ فرمایا تم نے ہی کتاب دانیال کو نقل کرکے لکھا ہے ؟ اس نے عرض کیا تو آپ اور حکم دیدیجئے میں اس کی اتباع کرلوں گا، فرمایا جاؤ اس کو گرم پانی اور اون کے ساتھ مٹاڈالو، اور اس کو قطعا نہ پڑھو اور نہ کسی اور کو پڑھاؤ۔ اگر مجھے اطلاع مل گئی کہ تم نے اس کو پڑھایا کسی کو پڑھایا ہے تو سخت سزا دوں گا۔
نزول قران سے دوسری آسمانی کتابیں منسوخ ہوگئیں۔
پھر حضرت عمر نے اسی طرح کا ایک اپناواقعہ بیان کیا فرمایا کہ ایک مرتبہ میں نے اہل کتاب کا ایک نسخہ تیار کرکے چمڑے میں لپیٹ کر آپ کی خدمت میں حاضر ہوا ، آپ نے دریافت کیا یہ کیا ہے ؟ عرض کیا ایک کتاب کا نسخہ ہے۔ جو میں نے تیار کیا ہے تاکہ ہمارے علم میں مزید اضافہ ہوجائے یہ سن کر رسول اللہ اس قدرغضبناک ہوئے کہ آپ کے دونوں رخسار مبارک سرخ ہوگئے پھر لوگوں کو جمع کرنے کے لیے نماز کا اعلان کیا گیا، انصار نے کہا تمہارے نبی غضبناک ہوگئے ہیں اسلحہ لو، اسلحہ لو، لوگوں نے جلدی سے منبر رسول کو گھیر لیا۔
پھر آپ نے فرمایا : اے لوگو ! مجھے جامع ترین اور آخری کلمات دیے گئے ہیں اور مجھے کلام کا خلاصہ اور نچوڑ دیا گیا اور میں تمہارے پاس صاف ستھری شریعت لے کر آیاہوں پس تم تذبذب اور تردد کا شکار مت ہوجاؤ اور یہ مضطرب لوگ یہودی و نصاری تمہیں حیران پریشان نہ کردیں حضرت عمر فرماتے ہیں کہ میں کھڑا ہوا اور عرض کیا، رضیت بااللہ ربا وبالاسلام دینا وبک رسولا۔ میں اللہ کے رب ہونے پر اسلام کے دین ہونے پر اور آپ کے رسول ہونے پر راضی ہواپھر آپ منبر سے نیچے اتر آئے۔ المسند لابی یعلی، ابن المنذر، ابن ابی حاتم، الضعفائ، للعقیلی ، نصرا لمقدسی ، السنن لسعید فی الحجہ، اور اس کا ایک اور طریق بھی ہے۔