١٦٢٨۔۔ جبیر بن نفیر حضرت عمر سے روایت کرتے ہیں حضرت عمر فرماتے ہیں کہ میں آپ کے زمانہ حیات میں چلا اور خیبر پہنچا، وہاں ایک یہودی کو پایا جو ایک بات کہتا تھا جو مجھے بہت پسند آئی میں نے اس کو کہا، کیا تم یہ بات میرے لیے لکھ دو گے ؟ اس نے اثبات میں جواب دیا، تو میں ایک چمڑا لے کر اس کے پاس پہنچا اور وہ مجھے لکھوانے لگا۔ جب میں لوٹا تو میں نے عرض کیا یارسول اللہ میں نے ایک یہودی کو بہت اچھی بات کہتے ہوئے پایا تھا میرا خیال ہے آپ کے بعد کسی اور نے ایسی بات نہیں کہی۔ حضور نے فرمایا امید ہے تم نے وہ لکھ لی ہوگی ؟ عرض کیا جی ہاں۔ آپ نے فرمایا اچھا لاؤ۔ تو میں گیا اور وہ تحریر لے کر آپ کی خدمت میں پہنچا، آپ نے فرمایا بیٹھو اور اس کو پڑھ کرسناؤ۔ میں نے تھوڑی دیر اس کو پڑھا ، پھر آپ کے چہرہ اقدس کی طرف نظر کی تو دیکھا کہ آپ کے چہرہ اقدس کا رنگ بدل چکا ہے۔ پھر تو مجھ پر ایسی گھبراہٹ طاری ہوئی کہ مزید اس کا ایک حرف بھی نہ پڑھ سکا۔ پھر میں نے وہ تحریر آپ کو دیدی۔ آپ اس کے ایک ایک حرف کو اپنے لعاب مبارک سے محو فرمانے لگے۔ اور ساتھ ساتھ یہ فرما رہے تھے کہ ان لوگوں کے پیچھے نہ پڑو یہ تو راہ بھٹک چکے ہیں اس طرح آپ نے اس سارے کو مٹاڈالا۔ الحلیہ۔