١٦٨٠۔۔ از مسند انس ۔ حضرت انس حضور سے اور آپ حضرت جبرائیل سے اور حضرت جبرائیل اللہ تعالیٰ سے روایت کرتے ہیں کہ جس نے میرے دوست کو خوف زدہ کیا دوسرے الفاظ میں میرے دوست کی اہانت کی اس نے مجھے کھلے عام جنگ کی دعوت دیدی، اور کوئی بندہ اس چیز کی ادائیگی کے سوا مجھ سے کسی اور چیز کے ساتھ زیادہ قریب نہیں پاسکتا، جو میں نے خود اس پر فرض کردی ہے اور بندہ مسلسل نفی عبادات میں مشغول رہتا ہے تو وہ میرا محبوب بن جاتا ہے اور جس سے میں محبت کرتا ہوں اس کے لیے میں کان آنکھ اور ہاتھ بن جاتاہوں اور اس کا حمایتی و مددگار بن جاتاہوں اگر وہ مجھ سے سوال کرتا ہے تو میں اس کو عطا کرتا ہوں اور وہ میرے لیے مخلص ہوجاتا ہے تو میں اس کے لیے مخلص خیرخواہ ہوجاتاہوں۔ اور میں کسی چیز میں تردد کا شکار نہیں ہوتا سوائے اس کے کہ جب میرے بندے کا آخری وقت آپہنچتا ہے پھر وہ موت کو ناپسند کرتا ہے جبکہ میں اس کی برائی کو ناپسند کرتا ہوں اور اس کے سواچارہ کار نہیں اور بعض میرے بندے اپنے لیے کسی عبادت کا دروازہ کھولنا چاہتے ہیں مگر میں اس بات کے پیش نظر اس دروازے کو اس پر بند رکھتاہوں کہ کہیں وہ عجب وپندار نفس میں مبتلا نہ ہوجائے اور یہ اس کے لیے تباہی کا پیش خیمہ بن جائے اور بعض میرے بندے ایسے ہوتے ہیں کہ ان کا ایمان ان کو غنی ومالداری کے سوا کوئی چیز راس نہیں دیتا۔ اگر میں ان کو فقر میں مبتلا کردوں تو وہ ان کو فتنہ و فساد کا شکار کردے۔ اور بعض میرے بندے ایسے ہوتے ہیں کہ ان کا ایمان ان کو فقر ہی میں درست رکھتا ہے۔ اور اگر میں ان کو غنی ومالداری بخش دوں تو یہی ان کی تباہی کا ذریعہ بن جائے اور بعض میرے بندے ایسے ہیں کہ ان کا ایمان ان کے لیے صحت و تندرستی کو خیر کا باعث بناتا ہے اگر میں ان کو بیماری میں مبتلا کردوں تو یہ بیماری ان کو خراب کردے اور بعض میرے بندے ایسے ہیں کہ ان کا ایمان ان کو بیماری میں مناسب رکھتا ہے اگر میں ان کو صحت و تندرستی عنایت کردوں تو وہ فساد و خرابی کا شکار ہوجائیں میں اپنے بندوں کے دلوں کے بھید جانتے ہوئے ان کی تدبیر کرتا ہوں میں علیم وخبیر ذات ہوں۔ ابن ابی الدنیا فی کتاب الاولیا، الحلیہ، ابن عساکر۔
اس میں صدقہ بن عبداللہ ہے جس کو امام احمد و امام بخاری اور نسائی نے ضعیف قرار دیا ہے اور امام ابوحاتم الرازی (رح) فرماتے ہیں کہ یہ محدثین میں صدق کا مرتبہ رکھتے ہیں یعنی کسی قدر ضعیف ہے لیکن قدریہ ہونے کا شبہ ہونے کی وجہ سے اس موضوع تقدیر کی روایت ان سے درست نہیں ۔ اور علامہ ذھبی کہتے ہیں کہ ان کی روایت کو بیان کرنے کی گنجائش ہے لیکن ان سے استدلال درست نہیں ہے اس کے لیے اور نیز ان راوی کے متعلق مفصل جرح وقدح کے لیے دیکھیے سیر اعلام النبلاء ج ٧ ص ٣١٦۔