١٦٩٦۔۔ از مسند حنظلہ بن الربیع الاسیدی ، حنظلہ الاسیدی جو رسول اللہ کے کاتبین میں شامل ہیں فرماتے ہیں کہ ہم آپ کے پاس حاضر تھے آپ نے جنت وجہنم کا ذکر کیا تو ہم پر ایسی کیفیت طاری ہوئی کہ گویا کہ ہم اسے اپنی آنکھوں سے دیکھ رہے ہیں پھر میں کھڑا ہوا اور اپنے اہل خانہ کی طرف چلا گیا۔ اور وہاں اپنے اہل و عیال کے ساتھ ہنسی کھیل میں مشغول ہوگیا پھر مجھے حضور کی محفل میں طاری ہونے والی وہ کیفیت یاد آگئی میں نکلا اور حضرت ابوبکر سے ملاا ورعرض کیا اے ابوبکر، وہ میں تو منافق ہوگیاہوں آپ (رض) نے دریافت فرمایا کیا بات ہے ؟ میں نے عرض کیا ہم جب نبی کے پاس حاضر ہوتے ہیں اور آپ ہم سے جنت وجہنم کا تذکرہ فرماتے ہیں تو گویا وہ ہماری آنکھوں کے سامنے ہے۔ پھر جب ہم وہاں سے نکلتے ہیں تو اولاد اور بیویوں کے ساتھ لہو ولعب اور بےکار چیزوں میں مشغول ہوجاتی ہیں اور اس وقت کو بھول جاتے ہیں حضرت ابوبکر نے فرمایا ہمارے ساتھ بھی یہی معاملہ ہے پھر میں آپ کے پاس حاضرہوا اور آپ سے اس کا ذکر کیا تو آپ نے فرمایا اے حنظلہ اگر اہل و عیال کے پاس بھی تمہاری وہی کیفیت برقرار رہے جو میرے ہاں ہوتی ہے تو فرشتے تم سے بستروں پر مصافحہ کرنے لگیں دوسری روایت میں ان الفاظ کا اضافہ ہے۔ لیکن اے حنظلہ یہ تو وقت وقت کی بات ہوتی ہے۔ الحسن بن سفیان۔ ابونعیم۔