١٧٣٣۔۔ ازمسند علی (رض)۔ علقمہ (رح) بن قیس سے مروی ہے کہ میں نے حضرت علی کو کوفہ کی جامع مسجد کے منبر پر یہ فرماتے ہوئے سنا کہ میں نے رسول اکرم کو فرماتے ہوئے سنا کہ آپ فرما رہے تھے کہ کوئی آدمی زنا کے وقت مومن نہیں رہتا، اور کوئی آدمی چوری کے وقت مومن نہیں رہتا، اور نہ کسی کی ذی شرف شی پر ڈاکہ ڈالتے وقت حالانکہ لوگ اس کی طرف نگاہیں بھرے دیکھ رہے ہوتے ہیں مومن رہتا، اور کوئی آدمی شراب نوشی کے وقت مومن نہیں رہتا۔ ایک شخص نے سوال کیا : اے امیرالمومنین تو کیا جس نے زناء کیا کفر کیا ؟ حضرت علی نے فرمایا کہ ہمیں رسول اللہ کا حکم ہے کہ رخصت کی احادیث کو مبہم رکھیں کوئی مومن زنا کے وقت مومن نہیں رہتا، جبکہ وہ اعتقاد رکھتا ہو کہ یہ زناء اس کے لیے حلال ہے کیونکہ اس کی حلت پر ایمان لانا صریحا کفر ہے اسی طرح کوئی آدمی چوری کے وقت مومن ہیں رہتا، جبکہ وہ اعتقاد رکھتاہو کہ یہ چوری اس کے لیے حلال ہے کیونکہ اس کی حلت پر ایمان لاناصریحا کفر ہے اسی طرح کوئی آدمی شراب نوشی کے وقت مومن نہیں رہتا، جبکہ وہ اعتقاد رکھتاہو کہ یہ شراب نوشی اس کے لیے حلال ہے کیونکہ اس کی حلت پر ایمان لاناصریحا کفر ہے اسی طرح کسی کی ذی شرف شی پر ڈاکہ ڈالتے وقت مومن نہیں رہتا، حالانکہ لوگ اس کی طرف نگاہیں بھرے دیکھ رہے ہوتے ہیں جبکہ وہ اعتقاد رکھتاہو کہ یہ ڈاکہ زنی اس کے لیے حلال ہے کیونکہ اس کی حلت پر ایمان لاناصریحا کفر ہے۔ الکبیر للطبرانی ، الصغیر للطبرانی ۔ اس میں ایک روای اسماعیل بن یحییٰ التیمی متروک ومتہم ہے لہٰذا اس کا اعتبار نہیں۔