١٧٣٧۔۔ محمد بن اسحق ، نعمان بن سعد سے روایت کرتے ہیں کہ چالیس یہودی حضرت علی کی خدمت میں حاضر ہوئے اور کہنے لگے ہمیں اپنے رب کے اوصاف بیان کروجو آسمان میں ہے کہ وہ کن کیفیات کے ساتھ ہے ؟ کیسے وجود پذیرہوا ؟ کب ہوا ؟ اور کس چیز پر وہ مستوی ہے۔ حضرت علی نے فرمایا اے گروہ یہود، سنو مجھ سے اور یہ پروا نہ کرو کہ کسی اور سے بھی سوال کرو گے۔
میرا رب وہ ایسی اول ترین ہستی ہے جس کی کسی چیز سے ابتداء نہیں ہوئی، جس کی کسی چیز سے ترکیب نہیں ہوئی، وہ کسی موہومی کیفیت کا نام نہیں اور نہ ہی کسی جسمانی ہیولے کا نام ہے جو نظروں میں قریب ودور ہوسکتا ہے وہ کسی پردے میں محجوب نہیں کہ جگہ کا محتاج ہو وہ کسی حادثے ووقوعہ سے وجود پذیر نہیں ہوا کہ یہ اس کو فانی کہا جاسکے بلکہ وہ اس بات سے عظیم اور بالاتر ہے کہ اشیاء کی کیفیات خواہ جو بھی ہوں کے ساتھ متصف ہو۔ وہ زوال پذیر ہوا اور نہ کبھی ہوگا، نہ اس کی ایک شان فناہوکر دوسری تبدیل ہوگی آخراس کو کس طرح اجسام واشباہ کے ساتھ متصف کیا جاسکتا ہے ؟ اور کیسے فصیح ترین زبانوں کے ساتھ اس کی صفات بیان کی جاسکتی ہیں ؟ وہ اشیاء میں داخل ہی نہیں تھا کہ کہا جائے کہ اس نے وجود پالیا، اور نہ کسی چیز سے اس کی بنا ہوئی کہ کہا جائے وہ بن گیا۔ بلکہ وہ ہر کیفیت سے آزاد ہے وہ شہ رگ سے قریب تر ہے جسم وشباہت میں ہر شی سے بعید تر ہے۔ اس پر بندوں کا ایک لحظہ اور ایک لفظ کا نکلنا ایک قدم کا قریب ہونا اور ایک قدم کا دور ہونا خواہ انتہائی تاریک رات کے آخری پہر میں ہوتب بھی ان چیزوں کی نقل و حرکت اللہ سے مخفی نہیں رہتی ، چودھویں رات کے ماہتاب اور بھڑکتے دن کے آفتاب کے اپنے اپنے محوروں کی گردش کا کوئی لمحہ، روشنی وشعاعوں سمیت اس سے پوشیدہ نہیں ہوتا، اپنی ظلمتوں سمیت آنے والی رات اور اپنی ضیاء پاشیوں سمیت جانے والے دن کی کوئی کیفیت اس سے اوجھل نہیں ہوتی، بلکہ وہ اپنی قدرت تکوینیہ میں جو چاہے اس پر پوری طرح حاوی محیط ہے وہ ہر کون ومکان ، ہر لمحہ وگھڑی ، ہر انتہاء ومدت کو خوب خوب جاننے والا ہے ، مدت وغایت صرف مخلوق پر مسلط ہے حدود کا دائرہ اس کے سوا ہر ایک کو محیط ہے۔ اس نے اشیاء کو پہلے سے کسی طے شدہ اصول کے مطابق تخلیق نہیں فرمایا اور نہ اپنے سے اول ترین اشیا کی مدد سے پیدا کیا، بلکہ جس کو جی سے چاہا پیدا کیا اور اس کی تخلیق کو مکمل قائم فرمایا، اور اس کی صورت گری کی۔ اور بہترین صورت بنائی وہ اپنی علو شان میں یکتا ہے۔ کسی شے کی اس کو رکاوٹ نہیں اس کو اپنی مخلوق کی طاعت سے ذرہ بھر نفع نہیں ، پکارنے والوں کی حاجت روائی کرنا اس کا وطیرہ ہے ملائکہ آسمان و زمین کی وسعتوں میں اس کی اطاعت پر سرافگندہ ہیں بوسیدہ ہوجانے والے مردوں کے ذرہ ذرہ کا علم اس کو یوں ہے جس طرح جیسے جی پھرنے والے کے متعلق اس کا علم ۔ بلند وبالا آسمانوں کے اندر جو کچھ ہے اس کو اسی طرح معلوم ہے جس طرح پست زمینوں کے ذرات تک کا علم ہے۔ اس کا علم ہرچیز کو محیط ہے اس کو آوازوں کے اختلاط سے چنداں حیرانی پریشانی کا سامنا نہیں ۔ طرح طرح کی بولیاں اس کو ایک دوسرے سے مشغول نہیں کرتیں، وہ ہر طرح کی مختلف آوازوں کو سنتا اور بھرپور سمجھتا ہے وہ بغیر اعضاء وجوارح کے ان کے ساتھ مانوس ہے۔ صاحب تدبیر ، بصیر اور تمام امور کا بخوبی جاننے والا ہے ، زندہ پائندہ ہے ہر عیب سے منزہ ہے اس نے موسیٰ سے اعضا والات کے بغیر اور ہونٹ اور دیگرمخارج اصوات کے بغیر کلام کیا۔ وہ پاکیزہ وعالی شان ہر طرح کی کیفیات سے مبراومنزہ ہے جس نے گمان کیا کہ ہمارا الہ ممدود و محدود ہے، وہ درحقیقت اپنے خالق ومبعود سے جاہل ہے اور جس نے کہا کہ کون ومکان اس کو گھیرے ہوئے ہیں وہ حیران پریشان اور ملتبس رہے گا، وہ توبل کہ اس کے برعکس ہر مکان کو گھیرے ہوئے ہے پس اگر ے اے مکلف انسان تورحمن کی صفات قرآن کے خلاف بیان کرسکتا ہے تواتناہی کردکھا کہ ہمیں جبرائیل (علیہ السلام) میکائیل (علیہ السلام) اور اسرافیل (علیہ السلام) کی صفات اور شکل و صورت بیان کردے ؟ صدافسو س تو اپنی مثل مخلوق کی ہیبت وصفت بیان نہیں کرسکتا، تو خالق و معبود کی ہیت وصفت بیان کرنے پر کی سے آمادہ ہمت ہوا ؟ تو ان ہیبت والات کے رب کی صفت کا ادراک ہی نہیں کرسکتا، ؟ چہ جائے کہ اس ذات کا ادراک کرے جسے اونگھ آتی ہے اور نہ نیند اور جو کچھ آسمان و زمین میں ہے اور ان کے درمیان ہے وہ سب اسی کا ہے۔ اور وہ عرش عظیم کا پروردگار ہے۔ الحلیہ۔ صاحب حلیہ (رح) فرماتے ہیں کہ یہ نعمان کی حدیث ہے ابن اسحاق نے بھی اس کو اسی طرح مرسلا روایت کیا ہے۔