17789 ۔۔۔ شعبی (رح) سے مروی ہے کہ ایک مرتبہ حضرت علی بن ابی طالب (رض) (اپنے دور خلافت میں) بازار کی طرف نکلے وہاں ایک نصرانی کو دیکھا کہ آپ (رض) کی زرہ فروخت کررہا ہے۔ سیدنا حضرت علی المرتضی (رض) نے اپنی زرہ پہچان لی اور فرمایا یہ تو میری زرہ ہے۔ چلو میرے اور تمہارے درمیان مسلمانوں کا قاضی (جج) فیصلہ کرے گا۔ اس وقت مسلمانوں کے قاضی قاضی شریح تھے ۔ امیر المؤمنین سیدنا حضرت علی المرتضی (رض) کو دیکھا تو اپنی مسند قضاء سے اٹھ گئے ۔ سیدنا حضرت علی المرتضی (رض) کو اپنی جگہ بٹھایا اور خود ان کے سامنے نصرانی کے ساتھ کھڑے ہوگئے ۔ سیدنا حضرت علی المرتضی (رض) نے فرمایا : اگر میرا خصم (مخالف) مسلمان ہوتا تو میں اس کے ساتھ کٹہرے میں ضرور کھڑا ہوجاتا ۔ لیکن میں نے رسول اکرم (صلی اللہ علیہ وآلہ وسلم) سے سنا ہے کہ ان لوگوں کے ساتھ نہ مصافحہ کرو ، نہ سلام میں پہل کرو ، نہ ان کے مریضوں کی عیادت کرو ، نہ ان پر نماز جنازہ پڑھو اور ان کو تنگ راستوں میں چلنے پر مجبور کرو اور ان کو ذلیل کرو جیسے اللہ نے ان کو ذلیل کر رکھا ہے۔
اے شریح میرے اور ان کے درمیان فیصلہ کرو ۔ حضرت شریح (رح) نے ۔ نصرانی سے پوچھا : اے نصرانی تو کیا کہتا ہے ؟ نصرانی بولا : میں امیر المؤمنین کو تو نہیں جھٹلاتا مگر زرہ میری ہی ہے۔ حضرت شریح (رح) نے حضرت امیر المؤمنین سیدنا حضرت علی المرتضی (رض) کو فرمایا : آپ کو ان سے زرہ لینے کا حق نہیں جب تک آپ گواہ پیش نہ کریں ۔ سیدنا حضرت علی المرتضی (رض) نے فرمایا : شریح نے سچ کہا ۔ نصرانی بولا : میں شہادت دیتا ہوں کہ یہ احکام انبیاء ہی کی طرف سے ملتے ہیں ، دیکھو امیر المؤمنین اپنے قاضی کے پاس آتا ہے اور انہی کا قاضی انہی کے خلاف فیصلہ کرتا ہے۔ اے امیر المؤمنین ! اللہ کی قسم ! یہ زرہ آپ کی ہے۔ ایک مرتبہ کسی لشکر میں میں آپ کے پیچھے پیچھے ہو لیا تھا ۔ آپ کی یہ زرہ آپ کے مٹیالے اونٹ پر سے کھسک کر نیچے گرگئی تھی اور میں نے اٹھالی تھی ۔ اب میں (اسلام قبول کرتا ہوں اور) شہادت دیتا ہوں کہ ” لا الہ الا اللہ محمد رسول اللہ “۔ سیدنا حضرت علی المرتضی (رض) نے ارشاد فرمایا : جب تم مسلمان ہوگئے ہو تو یہ زرہ تمہاری ہوئی اور پھر آپ (رض) نے اس کے علاوہ ایک عمدہ گھوڑا بھی اس نومسلم کو ہبہ فرما دیا ۔ (رواہ البیھقی ، ابن عساکر)