17795 ۔۔۔ ابراہیم بن یزید تیمی اپنے والد سے روایت کرتے ہیں کہ حضرت علی بن ابی طالب (رض) نے اپنی ایک زرہ ایک یہودی کے پاس پائی جو اس نے اٹھالی تھی ۔ آپ (رض) نے اس کو پہچان لیا اور فرمایا ، یہ تو میری زرہ ہے جو میرے خاکستری اونٹ سے گرگئی تھی ۔ یہودی نے کہا ، یہ میری زرہ ہے اور میرے ہاتھ میں ہے۔ اور میرے اور تمہارے درمیان مسلمانوں ہی کا قاضی اس کا فیصلہ کرے گا ۔ پس یہ لوگ قاضی شریح کے پاس آئے ، قاضی شریح (رح) نے حضرت علی (رض) کو آتے دیکھا تو اپنی جگہ سے اٹھ گئے اور سیدنا حضرت علی المرتضی (رض) اس کی جگہ بیٹھ گئے ۔ پھر سیدنا حضرت علی المرتضی (رض) نے ارشاد فرمایا : اگر میرا مخالف فریق مسلمان ہوتا تو میں اس کے ساتھ بیٹھتا لیکن میں نے رسول اللہ (صلی اللہ علیہ وآلہ وسلم) سے سنا ہے ارشاد فرمایا تم ان کے ساتھ ایک مجلس میں برابر نہ بیٹھو ، ان کے مریضوں کی عیادت نہ کرو ، ان کے جنازوں کی مشایعت نہ کرو ، راستوں میں ان کو تنگ جگہ میں چلنے پر مجبور کرو ۔ اگر وہ تم کو گالی دیں تو تم ان کو مارو، اگر وہ تم کو ماریں تو ان سے قتال کرو ۔
پھر حضرت قاضی شریح (رح) نے سیدنا حضرت علی المرتضی (رض) سے عرض کیا : یا امیر المؤمنین آپ کیا چاہتے ہیں ؟ سیدنا حضرت علی المرتضی (رض) نے ارشاد فرمایا : میری زرہ میرے اونٹ سے گرگئی تھی جو اس یہودی نے اٹھالی ہے۔ پھر قاضی شریح (رح) نے یہودی سے پوچھا : اے یہودی تو کیا کہتا ہے ؟ یہودی نے کہا : یہ میری زرہ ہے اور میرے قبضہ میں ہے۔ پھر قاضی شریح (رح) نے سیدنا حضرت علی المرتضی (رض) کو کہا : اے امیر المؤمنین اللہ کی قسم : آپ سچ کہتے ہیں ، یقیناً یہ آپ ہی کی زرہ ہے۔ مگر پھر بھی آپ کو دو گواہ پیش کرنا ضروری ہیں۔ سیدنا حضرت علی المرتضی (رض) نے اپنے غلام قنبر اور اپنے بیٹے حضرت حسن (رض) کو بلایا ، دونوں نے یہ گواہی دی کہ یہ آپ (رض) کی زرہ ہے۔ قاضی شریح (رح) نے فرمایا (یا امیر المؤمنین) آپ کے غلام قنبر کی گواہی تو ہم درست تسلیم کرلیتے ہیں لیکن آپ کے بیٹے کی شہادت کو ہم تسلیم نہیں کرتے ۔ سیدنا حضرت علی المرتضی (رض) نے قاضی شریح (رح) کو فرمایا : تیری ماں تجھے روئے تم نے سیدنا حضرت عمر ابن خطاب (رض) کو یہ روایت سناتے ہوئے نہیں سنا کہ رسول اللہ (صلی اللہ علیہ وآلہ وسلم) نے ارشاد فرمایا تھا : حسن اور حسین اہل جنت کے جوانوں کے سردار ہیں ؟ قاضی شریح (رح) نے فرمایا : جی ہاں اللہ جانتا ہے۔ (یہ بات برحق ہے) سیدنا حضرت علی المرتضی (رض) نے فرمایا : کیا تم میرے جنت کے سردار کی شہادت کو جائز قرار نہیں دیتے ؟ قاضی شریح (رح) نے فیصلہ سناتے ہوئے یہودی کو فرمایا : تم زرہ لے لو ۔ یہودی نے کہا : واہ : امیر المؤمنین میرے ساتھ مسلمانوں کے قاضی کے پاس آئے اور قاضی نے ان کے خلاف فیصلہ دیا اور امیر المؤمنین اس پر راضی ہیں۔ اے امیر المؤمنین ! اللہ کی قسم ! آپ سچ بولتے ہیں یہ زرہ آپ کی ہے۔ آپ کے اونٹ سے گرگئی تھی جو میں نے اٹھالی تھی ۔ میں شہادت دیتا ہوں کہ اللہ کے سوا کوئی معبود نہیں اور محمد اللہ کے رسول ہیں۔ ” لا الہ الا اللہ محمد رسول اللہ “۔ سیدنا حضرت علی المرتضی (رض) نے وہ زرہ سابق یہودی نومسلم کو ہبہ کردی اور سات سو درہم انعام عطا کیا ۔ وہ نو مسلم ہمیشہ آپ کے ساتھ رہا حتی کہ جنگ صفین میں آپ کے ہمراہ لڑتے ہوئے شہید ہوگیا (الحاکم فی الکنی ، حلیۃ الاولیاء ابن الجوزی فی الواھیات)
کلام : ۔۔۔ یہ روایت ضعیف ہے اور اعمش بن ابراہیم کی حدیث ہے۔ حکیم اس کی روایت میں متفرد ہیں ، قاضی شریح کی اولاد نے عن شریح عن علی کے واسطہ سے اس کے مثل روایت نقل کی ہے۔