حضور اکرم (صلی اللہ علیہ وآلہ وسلم) نہ کوتاہ قد تھے اور نہ بہت لمبے ۔ آپ کے بال مبارک نہ سخت چھلے دار تھے اور نہ بالکل سیدھے ۔ بلکہ آپ قدرے گھنگھریالے اور سیاہ بالوں والے تھے ۔ آپ (صلی اللہ علیہ وآلہ وسلم) کا سر اقدس بڑا تھا سفید رنگت سرخی کے ساتھ ملی ہوئی تھی ۔ چوڑے اور دراز بازوؤں والے تھے ۔ ہاتھ ہاتھ پاؤں گوشت سے بھر پور تھے حلق کے نیچے ہڈی سے لے کر ناف تک بالوں کی لمبی اور باریک سے لکیر تھی آپ کی پلکیں لمبی (اور گھنی) تھیں بھنوئیں ملی ہوئی تھیں ۔ پیشانی سیدھی اور ہموار تھی دونوں شانوں (کندھوں) کے درمیان فاصلہ تھا چلتے تو گویا (جھکے ہوئے) نیچے کو اتر رہے ہیں میں نے آپ سے پہلے آپ جیسا کوئی دیکھا اور نہ آپ کے بعد آپ جیسا کوئی دیکھا ۔ حضرت علی (رض) پھر خاموش ہوئے تو یہودی عالم نے کہا : اور کچھ بھی بیان کرو حضرت علی (رض) نے فرمایا : فی الحال میرے ذہن میں یہی تھا یہودی عالم نے کہا : آپ کی آنکھوں میں کچھ کچھ سرخی تھی ۔ آپ کی ڈاڑھی خوبصورت (اور بھری ہوئی) تھی حسین دہانہ تھا کان مکمل (اور حسین تھے) پورے متوجہ ہوتے اور پورے مڑتے تھے ۔ حضرت علی (رض) نے فرمایا : قسم اللہ کی ! یہ بھی آپ کی صفات تھیں ۔ عالم بولا : اور کچھ ؟ حضرت علی (رض) نے دریافت فرمایا اور کیا ؟ عالم بولا : آپ حیادار تھے حضرت علی (رض) نے فرمایا وہ تو میں نے کہا تھا کہ آپ قدرے جھکے ہوئے چلتے تھے گویا ن نیچے کو اتر رہے ہیں۔ یہودی عالم بولا یہ صفات میں نے اپنے آباء و اجداد کی دستاویزات میں آخری نبی کی پائی ہیں نیز ہم نے یہ بھی لکھا دیکھا ہے کہ وہ نبی اللہ کے حرم اللہ کے امن کی جگہ اور اس کے گھر کے پاس نبی بنا کر بھیجے جائیں گے پھر وہ دوسرے حرم کی طرف ہجرت کریں گے جس کو وہ خود حرم قرار دیں گے اور اس کی حرمت بھی اللہ کے حرم کے برابر ہوگی ۔ نیز ہم نے یہ بھی لکھا پایا ہے کہ آپ ایسی قوم کی طرف ہجرت کریں گے جو آپ کے مددگار و انصار ہوں گے اور عمرو بن عامر کی اولاد ہوں گے وہ کھجوروں کے باغات والے ہوں گے اور ایسی سر زمین میں فروکش ہوں گے جہاں ان سے پہلے یہود بھی آباد ہوں گے ۔ حضرت علی (رض) نے ارشاد فرمایا : ہاں ہاں یہی ہمارے اللہ کے رسول ہیں۔ یہودی عالم بولا : پس میں بھی شہادت دیتا ہوں کہ وہ نبی ہیں اللہ کے رسول ہیں اور وہ تمام انسانوں کی طرف بھیجے گئے ہیں۔ پس میں اسی (دین اسلام) پر زندگی گزاروں گا اور اسی پر مروں گا اور ان شاء اللہ اسی ) دین) پر اٹھایا جاؤں گا ۔ (ابن سعد ابن عساکر)