18568 ۔۔۔ آل علی بن ابی طالب کے ایک فرزند ابراہیم بن محمد سے مروی ہے کہ حضرت علی بن ابی طالب (رض) جب حضور اکرم (صلی اللہ علیہ وآلہ وسلم) کے اوصاف بیان فرماتے تھے تو یہ ارشاد فرماتے تھے : حضور اکرم (صلی اللہ علیہ وآلہ وسلم) نہ بہت اونچے لمبے تھے اور نہ بالکل پست قد تھے ۔ بلکہ لوگوں میں سب سے قد آور معلوم ہوتے تھے ۔ آپ کے بال نہ بالکل سخت چھلے دار تھے اور نہ بالکل سیدھے لمبے کسی قدر گولائی لیے ہوئے سیدھے بال تھے ۔ نہ آپ موٹے تھے اور نہ آپ کے چہرے پر گوشت لٹکا ہوا تھا ، آپ کا چہرہ گول (اور کتابی) تھا ۔ آپ (صلی اللہ علیہ وآلہ وسلم) سرخی مائل سفید رنگت والے تھے ۔ آنکھوں کی پتلیاں نہایت سیاہ تھیں اور آنکھیں بڑی بڑی تھیں ۔ پلکیں دراز تھیں ۔ مضبوط اور گٹھے ہوئے اعصاب کے مالک تھے ، سینے پر بالوں کے باریک خط کے سوا سینے اور کمر پر اور بال نہ تھے ۔ ہاتھ اور پاؤں گوشت سے بھرے ہوئے تھے ۔ جب چلتے تھے تو قدم اکھاڑ کر رکھتے تھے ۔ اور قدرے جھک کر چلتے تھے ۔ کسی طرف دیکھتے تو پورے وجود کے ساتھ متوجہ ہوجاتے تھے ۔ دونوں شانوں کے درمیان مہر نبوت تھی ، آپ (صلی اللہ علیہ وآلہ وسلم) خاتم النبیین تھے ۔ سب سے زیادہ سخی دست تھے ۔ سب سے زیادہ کشادہ سینے والے تھے ۔ سب سے زیادہ سچ بولنے والے تھے ۔ سب سے زیادہ وفادار دوست تھے ، سب سے زیادہ ہنس مکھ اور نرم مزاج انسان تھے ، سب سے زیادہ عزت والے خاندان والے تھے ۔ جو آپ کو اچانک دیکھتا مرعوب ہوجاتا تھا ۔ جو آپ کے ساتھ کچھ دیر کے لیے ساتھ رہ لیتا وہ آپ سے محبت کرنے لگ جاتا تھا ۔ آپ کی صفت بیان کرنے والا ہر ایک شخص کہتا تھا کہ میں نے آپ جیسا کوئی عظیم و خوبصورت انسان نہیں دیکھا ۔ پہلے اور نہ بعد میں ۔ (ترمذی واسنادہ متصل ، ہشام بن عمار فی البعث ، الکجی ، الدلائل للبیھقی) یارب صل وسلم دائما ابدا ابدا ۔۔ علی حبیبک خیر الخلق کلھم :