18621 ۔۔۔ حضرت عبداللہ ابن عباس (رض) سے مروی ہے کہ انھوں نے سیدنا حضرت عمر ابن خطاب (رض) کو فرماتے ہوئے سنا : کہ ایک دن حضور اکرم (صلی اللہ علیہ وآلہ وسلم) دوپہر کے وقت باہر نکلے تو سیدنا حضرت ابوبکر صدیق (رض) کو مسجد میں پایا حضور اکرم (صلی اللہ علیہ وآلہ وسلم) نے ابوبکر (رض) سے پوچھا : اس وقت تم کو یہاں کس چیز نے آنے پر مجبور کیا ؟ سیدنا حضرت ابوبکر صدیق (رض) نے ارشاد فرمایا : یا رسول اللہ ! مجھے اسی چیز نے یہاں آنے پر مجبور کیا ہے جس نے آپ کو یہاں آنے پر مجبور کیا ہے۔ اسی اثناء میں عمر بن خطاب (رض) بھی وہاں آگئے ۔ حضور اکرم (صلی اللہ علیہ وآلہ وسلم) نے ان سے بھی وہاں آنے کی وجہ دریافت کی ۔ انھوں نے عرض کیا : مجھے بھی وہی چیز یہاں لائی ہے۔ جو آپ دونوں کو لائی ہے۔ پھر عمر بھی بیٹھ گیا ۔ رسول اللہ (صلی اللہ علیہ وآلہ وسلم) دونوں کو کچھ باتیں ارشاد فرماتے رہے ۔ پھر آپ (صلی اللہ علیہ وآلہ وسلم) نے دونوں حضرات سے دریافت فرمایا : کیا تم دونوں فلاں باغ تک چلنے کی سکت رکھتے ہو ؟ وہاں کھانا پانی اور سایہ ملے گا ۔ دونوں حضرات نے اثبات میں جواب دیا ۔ لہٰذا آپ نے فرمایا : پھر چلو ہمارے ساتھ ابوالہیثم بن التیہان انصاری کے گھر ۔ سیدنا حضرت عمر ابن خطاب (رض) فرماتے ہیں : چنانچہ حضور اکرم (صلی اللہ علیہ وآلہ وسلم) چل دیئے اور ہم بھی ان کے پیچھے ہو لیے ۔ حضور اکرم (صلی اللہ علیہ وآلہ وسلم) نے سلام کیا اور تین بار اجازت لی ، ام الہیثم دروازے کے پیچھے کھڑی ہوئی حضور اکرم (صلی اللہ علیہ وآلہ وسلم) کی آواز سن رہی تھی ان کی منشاء تھی کہ رسول اللہ (صلی اللہ علیہ وآلہ وسلم) کے مبارک بول اور زیادہ سنیں ۔ جب آخر حضور اکرم (صلی اللہ علیہ وآلہ وسلم) لوٹنے لگے تو ام الہیثم جھٹ نکلیں اور دروازے کی اوٹ سے بولیں کہ یا رسول اللہ ! اللہ کی قسم ! میں نے آپ کا سلام سنا تھا ۔ بس میرے میں خواہش ہوئی کہ آپ کی مزید دعائیں ہم کو ملیں ۔ حضور اکرم (صلی اللہ علیہ وآلہ وسلم) نے فرمایا : خیر ہے ، پھر پوچھا : ابو الہیثم کہاں ہے مجھے نظر نہیں آرہے ؟ ام الہیثم نے عرض کیا : قریب ہی ہیں ، گھر کے لیے میٹھا پانی بھرنے گئے ہیں۔ آپ اندر تشریف لے آئیے ، وہ بھی آتے ہی ہوں گے ان شاء اللہ ۔ پھر انھوں نے ہمارے لیے چٹائی بچھا دی ۔ چنانچہ ابو الہیثم آئے تو ہم کو دیکھ کر بہت خوش ہوئے اور ان کی آنکھیں بھی ہم سے ٹھنڈی ہوگئیں ۔ وہ آکر فورا ایک درخت پر چڑھے اور کھجور کا ایک خوشہ توڑ لائے ۔ حضور اکرم (صلی اللہ علیہ وآلہ وسلم) نے ارشاد فرمایا : کافی ہے ابو الہیثم نے عرض کیا : یا رسول اللہ (صلی اللہ علیہ وآلہ وسلم) آپ اور آپ کے ساتھی اس سے نرم اور سخت من پسند کھجوریں کھائیں ۔ پھر وہ پانی لے کر آئے ، ہم نے کھجوروں کے ساتھ پانی بھی پیا، حضور اکرم (صلی اللہ علیہ وآلہ وسلم) نے ارشاد فرمایا : یہ وہ نعمتیں ہیں ، جن کے بارے میں تم سے سوال کیا جائے گا ۔ پھر ابو الہیثم کھڑے ہو کر بکری ذبح کرنے اٹھے ، آپ (صلی اللہ علیہ وآلہ وسلم) نے دودھ والی بکری ذبح کرنے سے اجتناب کا حکم دیا ۔ ام الہیثم آٹا گوندھنے اور روٹی پکانے میں مصروف ہوگئیں ۔ حضور اکرم (صلی اللہ علیہ وآلہ وسلم) ابوبکر اور عمر (رض) نے اپنے سر قیلولہ (دوپہر میں آرام ) کے لیے رکھ دیئے ۔ جب کچھ دیر بعد وہ اٹھے تو کھانا تیار ہوچکا تھا ۔ ان کے سامنے کھانا رکھا گیا ۔ سب نے کھایا انھوں نے کھانا کھایا اور سیر ہوگئے اور اللہ کی حمد وثناء اور شکر ادا کیا ، پھر ام الہیثم نے بچا ہوا کھجوروں کا خوشہ سامنے رکھ دیا ۔ انھوں نے کچی پکی کھجوریں کھائیں ۔ پھر رسول اللہ (صلی اللہ علیہ وآلہ وسلم) نے ان کو سلام کیا اور ان کے لیے خیر کی دعا کی پھر ابو الہیثم کو فرمایا : جب تم کو خبر ملے کہ ہمارے پاس قیدی آئے ہیں تو آجانا ۔ ام الہیثم نے آپ (صلی اللہ علیہ وآلہ وسلم) سے عرض کیا : اگر آپ ہمارے لیے دعا کردیں تو اچھا ہو ۔ حضور اکرم (صلی اللہ علیہ وآلہ وسلم) نے فرمایا : ” افطر عندکم الصائمون واکل طعامکم الابرار وصلت علیکم الملائکۃ “۔ روزے دار تمہارے پاس افطار کریں ، تمہارا کھانا متقی لوگ کھائیں اور ملائکہ تم پر رحمتیں بھیجیں ۔ ابوالہیثم (رض) فرماتے ہیں : جب مجھے خبر ملی کہ رسول اللہ (صلی اللہ علیہ وآلہ وسلم) کے پاس غلام آئے ہیں تو میں حاضر خدمت ہوا ۔ آپ (صلی اللہ علیہ وآلہ وسلم) نے مجھے ایک غلام عطا کیا ۔ میں نے اس غلام کے ساتھ چالیس ہزار درہم پر مکاتبت کا سودا کرلیا میں نے اس سے زیادہ برکت والا غلام کوئی نہیں دیکھا ۔ (البزار ، مسند ابی یعلی ، الضعفاء للعقیلی ، ابن مردویہ ۔ البیھقی ، فی الدلائل ، السنن لسعید بن منصور)