18637 ۔۔۔ (مسند عمر (رض)) سیدنا حضرت عمر ابن خطاب (رض) سے مروی ہے کہ ایک شخص رسول اللہ (صلی اللہ علیہ وآلہ وسلم) کی خدمت میں آیا ۔ اور کچھ سوال کیا ۔ حضور اکرم (صلی اللہ علیہ وآلہ وسلم) نے فرمایا : فی الحال میرے پاس کچھ نہیں ہے تم ایسا کرو کسی سے قرض لے لو جیسے ہی ہمارے پاس کچھ آئے گا ہم تم کو عطا کردیں گے ۔ سیدنا حضرت عمر ابن خطاب (رض) نے عرض کیا : یا رسول اللہ ! آپ نے جو کچھ آپ کے پاس ہے عطا کردیا ۔ جو ہمارے پاس نہیں ہے اللہ نے ہمیں اسے دینے کا مکلف نہیں کیا ۔ یہ بات حضور اکرم (صلی اللہ علیہ وآلہ وسلم) کو ناگوار لگی ۔ جس کا اثر آپ کے چہرے میں بھی محسوس ہوا ۔ ایک انصاری شخص نے عرض کیا : یا رسول اللہ ! خرچ کیجئے اور عرش والے سے کمی کا ڈر نہ کیجئے ۔ یہ سن کر رسول اللہ (صلی اللہ علیہ وآلہ وسلم) مسکرا دیئے حتی کہ اس انصاری کے قول کا خوش گوار اثر آپ کے چہرے میں بھی دیکھا گیا ۔ پھر آپ نے ارشاد فرمایا : مجھے اسی کا حکم ملا ہے۔ (ترمذی ، فی الشمائل ، البزار ، ابن جریر ، الخرائطی فی مکارم الاخلاق ، الضیاء للمقدسی)