18664 ۔۔۔ خوات بن جبیر (رض) سے مروی ہے کہ ہم نے (سفر میں) رسول اللہ (صلی اللہ علیہ وآلہ وسلم) کے ساتھ وادی مرالظہران میں پڑاؤ ڈالا۔ میں وہاں اپنے خیمے سے باہر نکلا ۔ دیکھا کہ چند عورتیں آپس میں بات چیت میں مصروف ہیں۔ مجھے ان کا حسن و جمال اچھا لگا ۔ میں دوبارہ اپنے خیمے میں داخل ہوا۔ اپنا تھیلا نکالا ، پھر اس میں سے اپنا جوڑا نکالا اور زیب تن کر کے باہر نکلا اور ان عورتوں کے پاس جا بیٹھا ۔ اتنے میں رسول اللہ (صلی اللہ علیہ وآلہ وسلم) اپنے قبہ سے باہر نکلے ۔ آپ نے مجھ سے پوچھا : اے ابو عبداللہ ! کس وجہ سے ان کے ساتھ بیٹھے ہو ؟ میں نے رسول اللہ (صلی اللہ علیہ وآلہ وسلم) کو دیکھا تو مرعوب اور پریشان ہوگیا ۔ میں نے عرض کیا : یا رسول اللہ (صلی اللہ علیہ وآلہ وسلم) میرا اونٹ بدک گیا ہے۔ میں اس کے لیے رسی کی تلاش میں ان کے پاس آگیا تھا ۔ آپ (صلی اللہ علیہ وآلہ وسلم) اپنے راستے ہو لیے ۔ میں بھی آپ کے پیچھے چل پڑا ۔ آپ (صلی اللہ علیہ وآلہ وسلم) نے اپنی چادر اتاری اور پیلو کے جھنڈ میں داخل ہوگئے گویا میں اب بھی پیلو کے درختوں کے سبزے میں آپ کی پشت مبارک کی سفیدی کو چمکتا دیکھا رہا ہوں ، آپ نے اپنی حاجت پوری کی ۔ اور وضو کیا اور واپس ہو لیے ۔ پانی آپ کی ریش مبارک سے سینہ اقدس پر گر رہا تھا ۔ آپ نے مجھے دیکھ کر فرمایا : تمہارے اونٹ بدکنے کا کیا ہوا ؟ پھر ہم اس جگہ سے کوچ کر گئے ۔ دوران سفر جب بھی آپ (صلی اللہ علیہ وآلہ وسلم) مجھے ملتے یہی بات ارشاد فرماتے : السلام علیک ، اے ابو عبداللہ ! تمہارے اونٹ بدکنے کا کیا ہوا ۔ جب میں نے یہ صورت حال دیکھی تو میں جلد ہی مدینہ آگیا ۔ مسجد اور نبی (صلی اللہ علیہ وآلہ وسلم) کی مجالس سے دور رہنے لگا ۔ جب کافی عرصہ اس طرح بیت گیا تو میں ایک مرتبہ خالی مسجد میں تھوڑی دیر کے لیے گیا ۔ وہاں جا کر نماز کے لیے کھڑا ہوگیا ۔ اسی دوران نبی (صلی اللہ علیہ وآلہ وسلم) بھی اپنے حجرے سے نکل کر مسجد میں گئے ۔ آپ نے ہلکی سی دو رکعت نماز ادا فرمائی ۔ جبکہ میں نے اپنی نماز طویل کردی تاکہ آپ جائیں اور مجھے اکیلا چھوڑ دیں ۔ (یہ دیکھ کر) آپ (صلی اللہ علیہ وآلہ وسلم) نے ارشاد فرمایا : اے ابو عبداللہ ! جس قدر ہو سکے نماز لمبی کرلے ۔ میں بھی جانے والا نہیں ہوں جب تک تم نماز پوری نہیں کرلیتے ۔ تب میں نے اپنے جی میں کہا : اللہ کی قسم ! میں رسول اللہ (صلی اللہ علیہ وآلہ وسلم) سے اپنے فعل پر معذرت کرتا ہوں اور آپ کے سینے کو صاف کرتا ہوں ۔ چنانچہ میں نے نماز پوری کی ، آپ نے فرمایا السلام علیک اے ابو عبداللہ تمہارے اونٹ بدکنے کا کیا ہوا ؟ میں نے عرض کیا قسم ہے اس ذات کی جس نے آپ کو حق کے ساتھ مبعوث فرمایا ہے میں جب سے اسلام لایا ہوں ۔ میرا اونٹ کبھی نہیں بدکا پھر آپ (صلی اللہ علیہ وآلہ وسلم) نے تین بار ارشاد فرمایا : یرحمک اللہ اللہ تم پر رحم کرے ، اس کے بعد کسی چیز پر آپ (صلی اللہ علیہ وآلہ وسلم) نے مجھے نہیں ٹوکا ۔ (الکبیر للطبرانی)