18698 ۔۔۔ حضرت صہیب (رض) سے مروی ہے کہ رسول اللہ (صلی اللہ علیہ وآلہ وسلم) جب نماز پڑھ لیتے تھے تو منہ ہی منہ میں کچھ پڑھتے تھے ۔ جس کی ہم کو خبر نہ دیتے تھے ایک مرتبہ ہم نے عرض کیا : یا رسول اللہ ! آپ جب بھی نماز پڑھ لیتے ہیں تو پست آواز میں کچھ پڑھتے ہیں جو ہم کو سمجھ میں نہیں آتا ۔ آپ (صلی اللہ علیہ وآلہ وسلم) نے ارشاد فرمایا : تم نے مجھ سے سننے کی کوشش کی ؟ صہیب (رض) فرماتے ہیں میں نے عرض کیا : جی ہاں ۔ آپ (صلی اللہ علیہ وآلہ وسلم) نے ارشاد فرمایا : میں نے انبیاء (علیہ السلام) میں سے کسی نبی کو یاد کیا ۔ اللہ نے اس کو اسی کی قوم میں سے ایک لشکر عطا کیا تھا ۔ اس نبی نے ایک مرتبہ ان کو دیکھ کر فرمایا تھا : کون ان کا مقابلہ کرسکتا ہے ؟ تب اللہ پاک نے (بطور عتاب) اس پیغمبر کو فرمایا : اب اپنی قوم کے لیے تین باتوں میں سے کوئی ایک پسند کرلو، یا تو ہم ان پر کسی اور قوم میں سے دشمن مسلط کردیں ، یا عام موت یا عام بھوک سب کو آجائے ، پیغمبر نے اپنی قوم سے اس کا تذکرہ کیا اور ان سے مشورہ لیا ، قوم نے کہا : آپ اللہ کے نبی ہیں ، آپ ہی کوئی چیز اختیار فرما لیں ، چنانچہ پیغمبر نماز کے لیے کھڑے ہوئے ۔ یہ لوگ جب بھی کسی مصیبت کا شکار ہوتے تھے تو نماز میں مشغول ہوجاتے تھے ۔ پیغمبر نے قوم کو نماز پڑھائی پھر دعا کی : اے اللہ ! اگر تو ان پر ان کے کسی مخالف دشمن کو مسلط کرے یہ تو ہم کو منظور نہیں ، بھوک بھی ہم کو قبول نہیں ، ہاں موت کو ان پر مسلط فرما دے ، لہٰذا اللہ پاک نے ان پر موت کی ہوا چلا دی، پس تین دنوں میں ستر ہزار افراد لقمہ اجل بن گئے ، پس تب سے میں اندر ہی اندر یہ دعا کرتا ہوں : ” اللہم بک احاول وبک اصاول ولا قوۃ الا بک “۔ ے اللہ میں تیری مدد کے ساتھ ہی کسی چیز کا ارادہ کرتا ہوں تیری مدد کے ساتھ کسی پر حملہ کرتا ہوں اور ہر طرح کی طاقت وقوت تیری مدد کے ساتھ ممکن ہے۔ ” السنن لسعید بن منصور “۔