18758 ۔۔۔ حضرت عبداللہ ابن عمرو (رض) سے مروی ہے کہ جب حضور اکرم (صلی اللہ علیہ وآلہ وسلم) کی وفات ہوگئی سیدنا حضرت ابوبکر صدیق (رض) مسجد کے گوشے میں تھے ، آپ (رض) حضور اکرم (صلی اللہ علیہ وآلہ وسلم) کے پاس آئے ۔ آپ چادر میں لپٹے ہوئے تھے ۔ آپ (رض) نے آپ (صلی اللہ علیہ وآلہ وسلم) کی پیشانی پر منہ رکھا اور بوسہ دیتے ہوئے روتے رہے اور یہ فرماتے رہے : میرے ماں باپ آپ پر قربان ہوں آپ کی زندگی بھی اچھی رہی اور موت بھی ، پھر نکل کر جانے لگے تو سیدنا حضرت عمر ابن خطاب (رض) کے پاس سے گزرے ، سیدنا حضرت عمر ابن خطاب (رض) لوگوں کو فرما رہے تھے : رسول اللہ (صلی اللہ علیہ وآلہ وسلم) مرے ہیں اور نہ مریں گے جب تک منافقوں کو قتل نہ کردیں اور اللہ پاک منافقوں کو ذلیل ورسوا نہ کر دے ۔ حضرت عبداللہ ابن عمرو (رض) فرماتے ہیں : منافقین حضور اکرم (صلی اللہ علیہ وآلہ وسلم) کی وفات پر خوش ہوئے تھے لہٰذا انھوں نے اس موقع پر سر اٹھالیے ۔ پھر سیدنا حضرت ابوبکر صدیق (رض) آپ (رض) کے پاس سے گزرے تو فرمایا : اے آدمی ! اپنے آپ پر قابو رکھ ! بیشک رسول اللہ (صلی اللہ علیہ وآلہ وسلم) وفات پا گئے ہیں۔ کیا تو نے اللہ کا یہ فرمان نہیں سنا : (آیت)” انک میت وانھم میتون “۔ بیشک آپ مرنے والے ہیں اور وہ بھی مرنے والے ہیں۔ نیز فرمان الہی ہے : (آیت)” وما جعلنا لبشر من قبلک الخلد افان مت فھم الخالدون “۔ ور آپ سے قبل ہم نے کسی بشر کے لیے دوام نہیں رکھا ۔ تو کیا اگر آپ مرجائیں گے تو وہ ہمیشہ رہ لیں گے ۔ پھر سیدنا حضرت ابوبکر صدیق (رض) منبر پر تشریف لائے اور اللہ کی حمد وثناء بیان کی اور فرمایا : ے لوگو ! اگر محمد تمہارے معبود تھے جس کی تم پرستش کرتے تھے تو تب معبود محمد وفات پاچکے ہی ۔ اور اگر تمہارا معبود وہ ہے جو آسمانوں میں ہے تو تمہارا معبود نہیں مرا ۔ پھر آپ نے یہ مکمل آیت تلاوت کی : (آیت)” وما محمد الا رسول قد خلت میں قبلہ الرسل أفان مات اوقتل انقلبتم علی اعقابکم “۔ الی اخر الایۃ ۔ مسلمان لوگ یہ سن کر خوش ہوگئے ان کی خوشی کا کوئی ٹھکانا نہیں رہا (کہ ہمارا دین لازوال اور ہمارا معبود لازوال ہے) لیکن منافقوں کو تکلیف نے دبوچ لیا ۔ حضرت عبداللہ ابن عمرو (رض) فرماتے ہیں : قسم اس ذات کی جس کے ہاتھ میں میری جان ہے گویا کہ ہمارے چہروں پر ایک پردہ پڑا ہوا تھا جو اس تقریر سے چھٹ گیا ۔ (ابن ابی شیبہ ، مسند البزار)