18785 ۔۔۔ سیدنا حضرت علی المرتضی (رض) سے مروی ہے کہ حضور اکرم (صلی اللہ علیہ وآلہ وسلم) کی وفات سے تین یوم قبل اللہ پاک نے جبرائیل (علیہ السلام) کو آپ کے پاس بھیجا ۔ حضرت جبرائیل (علیہ السلام) نے فرمایا : اے احمد ! اللہ عزوجل نے مجھے آپ کے پاس بھیجا ہے آپ کے اکرام آپ کی فضیلت اور آپ کی خصوصیت کی وجہ سے کہ پروردگار آپ سے زیادہ آپ کو جانتا ہے پھر بھی پوچھتا ہے کہ آپ اپنے آپ کو کیسا محسوس کر رہے ہیں ؟ حضور اکرم (صلی اللہ علیہ وآلہ وسلم) نے فرمایا : اے جبرائیل (علیہ السلام) ! میں اپنے آپ کو تکلیف زدہ محسوس کررہا ہوں ۔ پھر جبرائیل (علیہ السلام) دوسرے روز تشریف لائے اور فرمایا : اے احمد اللہ نے مجھے آپ کے پاس آپ کے اکرام ، آپ کی فضیلت اور آپ کی خصوصیت کی وجہ سے بھیجا ہے پروردگار آپ سے پوچھتا ہے کہ آپ اپنے کو کیسا محسوس کر رہے ہیں ؟ حالانکہ پروردگار آپ سے زیادہ جانتا ہے۔ حضور اکرم (صلی اللہ علیہ وآلہ وسلم) نے فرمایا : اے جبرائیل ! میں تکلیف محسوس کررہا ہوں ، پھر جبرائیل (علیہ السلام) تیسرے روز تشریف لائے اور فرمایا : اے احمد ! اللہ نے مجھے آپ کے اکرام اور آپ کو فضیلت دینے کے لیے اور آپ کو خصوصیت بخشنے کے لیے بھیجا ہے پروردگار آپ سے زیادہ جانتا ہے پھر بھی پوچھتا ہے کہ اب آپ اپنے کو کیسا محسوس کر رہے ہیں ؟ حضور اکرم (صلی اللہ علیہ وآلہ وسلم) نے فرمایا میں اپنے آپ کو تکلیف زدہ پاتا ہوں ۔ اور اے جبرائیل (علیہ السلام) ! میں اپنے آپ کو رنجیدہ وغمزدہ محسوس کررہا ہوں ۔ جبرائیل (علیہ السلام) کے ساتھ ہوا میں اور ایک اور فرشتہ بھی اترا جس کو اسماعیل کہا جاتا تھا وہ ستر ہزار فرشتوں کا سردار تھا ، حضرت جبرائیل (علیہ السلام) نے فرمایا : اے احمد ! یہ ملک الموت ہے جو آپ سے اندر آنے کی اجازت مانگ رہا ہے۔ اس نے آپ سے پہلے کسی سے یہ اجازت نہیں مانگی اور نہ آپ کے بعد کسی سے مانگے گا ، رسول اللہ (صلی اللہ علیہ وآلہ وسلم) نے فرمایا : ان کو اجازت دے دو ۔ چنانچہ حضرت جبرائیل (علیہ السلام) نے ان کو اندر آنے کی اجازت دے دی اور وہ بھی تشریف لے آئے ۔ انھوں نے کہا : اے احمد ! اللہ نے مجھے آپ کے پاس بھیجا ہے اور مجھے آپ کی اطاعت کرنے کا حکم دیا ہے۔ اگر آپ مجھے اپنی جان قبض کرنے کا فرمائیں گے تو میں قبض کرلوں گا اور اگر آپ اس کو ناپسند کرتے ہیں تو میں آپ کو چھوڑ دوں گا ۔ حضرت جبرائیل (علیہ السلام) نے فرمایا : اے احمد ! اللہ پاک آپ کی ملاقات کے مشتاق ہیں۔ حضور اکرم (صلی اللہ علیہ وآلہ وسلم) نے فرمایا : اے ملک الموت ! کر گزر جس کا تجھے حکم ملا ہے۔ حضرت جبرائیل (علیہ السلام) نے فرمایا : اے احمد ! تجھ پر (اس زندگی کا آخری) سلام ہو ۔ یہ میرا اس زمین پر آخری چکر ہے۔ دنیا میں میں صرف آپ کی وجہ سے آتا تھا ۔ جب رسول اللہ (صلی اللہ علیہ وآلہ وسلم) کی روح قبض ہوگئی اور تعزیت ہر طرف سے رونے کی آواز شروع ہوئیں تو ایک آنے والا آیا جس کی آہٹ لوگ محسوس کر رہے تھے مگر اس کا وجود نہیں دیکھ پا رہے تھے ۔ اس نے کہا : اے اہل بیت ! السلام علیکم و رحمۃ اللہ ۔ اللہ سے ہر مصیبت و تکلیف پر ثواب کی امید رکھو ۔ ہر ہلاک ہونے والے کے اچھے جانشین کا آسرا کرو ۔ ہر فوت شدہ شی کو اللہ سے پاؤ ۔ اللہ پر بھروسہ کرو ۔ اسی سے امید رکھو ، محروم تو وہ ہے جو ثواب سے محروم ہے۔ مصیبت زدہ وہ ہے جو ثواب سے محروم ہوگیا ۔ پس تم پر سلام ہو۔ سیدنا حضرت علی المرتضی (رض) نے پوچھا : جانتے ہو یہ کون تھے ؟ لوگوں نے کہا : نہیں ۔ سیدنا حضرت علی المرتضی (رض) نے فرمایا : یہ خضر (علیہ السلام) تھے ۔ (العدنی، ابن سعد ، البیہقی فی الدلائل)