18815 ۔۔۔ حضرت انس بن مالک (رض) سے مروی ہے کہ ہجرت کے موقع مکہ سے مدینہ تک کے سفر میں حضور اکرم (صلی اللہ علیہ وآلہ وسلم) ایک سواری پر سیدنا حضرت ابوبکر صدیق (رض) کو پیچھے بٹھائے ہوئے تھے ۔ سیدنا حضرت ابوبکر صدیق (رض) کا ملک شام آنا جانا تھا اس لیے وہ پہچانے جاتے تھے جبکہ نبی (صلی اللہ علیہ وآلہ وسلم) کا تعارف نہ تھا ۔ اس لیے لوگ راستے میں ملتے اور حضرت ابوبکر (رض) سے پوچھتے تھ کہ تمہارے آگے بیٹھا ہوا یہ غلام کون ہے ؟ سیدنا حضرت ابوبکر صدیق (رض) فرماتے ہیں یہ میرے رہنما ہیں جو مجھے سیدھا راستہ بتاتے ہیں۔ جب یہ دونوں حضرات مدینہ کے قریب پہنچ گئے تو حرہ مقام پر اتر گئے اور انصار کو پیغام بھیج دیا ۔ انصار مدینہ آگئے ۔ حضرت انس بن مالک (رض) فرماتے ہیں اس دن میں بھی آپ (صلی اللہ علیہ وآلہ وسلم) کے پاس حاضر ہوا تھا ، اس دن سے اچھا اور روشن چمکدار دن میں نے کوئی نہیں دیکھا جس دن ہمارے پاس تشریف لائے تھے ۔ اور میں اس دن بھی آپ (صلی اللہ علیہ وآلہ وسلم) کے پاس حاضر ہوا جس دن آپ کا انتقال ہوا ، اس دن سے زیادہ برا اور تاریک دن میں نے کوئی نہیں دیکھا جس دن آپ کی وفات ہوئی تھی ۔ (مصنف ابن ابی شیبہ)