18827 ۔۔۔ عباس بن عبدالمطلب سے مروی ہے میں حضور اکرم (صلی اللہ علیہ وآلہ وسلم) کی وفات کے وقت آپ کے پاس موجود تھا ۔ سکرۃ الموت (موت کی کیفیت) آپ پر طویل ہوتی جا رہی تھی پھر میں نے آپ (صلی اللہ علیہ وآلہ وسلم) کو پست آواز میں پڑھتے ہوئے سنا : ” مع الذین انعم اللہ علیھم من النبیین والصدیقین والشھداء والصالحین وحسن اولئک رفیقا “۔ (اے اللہ ! مجھے وفات دے کر شامل کر دے) ان لوگوں کے ساتھ جن پر اللہ نے انعام فرمایا ہے : انبیاء صدیقین ، شہداء اور صالحین میں سے اور یہ لوگ بہت اچھے رفیق ہیں۔ پھر آپ پر بےہوشی طاری ہوجاتی پھر افاقہ ہوتا تو یہی پڑھتے پھر (ایک مرتبہ) آپ نے فرمایا : میں تم کو نماز کی وصیت کرتا ہوں ، میں تم کو وصیت کرتا ہوں اپنے مملوکوں کے ساتھ خیر خواہی کی ۔ س کے بعد آپ کی روح قبض ہوگئی ۔ (رواہ ابن عساکر)