18829 ۔۔۔ ابو سعید (رض) سے مروی ہے ایک دن حضور اکرم (صلی اللہ علیہ وآلہ وسلم) ہمارے پاس نکل کر تشریف لائے ۔ ہم لوگ مسجد میں بیٹھے ہوئے ۔ حضور اکرم (صلی اللہ علیہ وآلہ وسلم) نے اپنے سر پر پٹی باندھی ہوئی تھی اسی مرض کی وجہ سے جس میں آپ کی وفات ہوئی ۔ پھر آپ منبر پر تشریف لائے۔ ہم آپ کے قریب اکٹھے ہوگئے ۔ ٓپ (صلی اللہ علیہ وآلہ وسلم) نے ارشاد فرمایا : قسم ہے اس ذات کی جس کے ہاتھ میں میری جان ہے۔ قیامت کے دن میں حوض پر کھڑا ہوا ملوں گا ۔ پھر فرمایا : ایک بندے پر دنیا اور اس کی زیب وزینت پیش کی گئی تھی لیکن اس نے آخرت کو پسند کرلیا ہے۔ اس بات کو سیدنا حضرت ابوبکر صدیق (رض) کے سوا کوئی نہ سمجھ سکا ، سیدنا حضرت ابوبکر صدیق (رض) کی آنکھیں ڈبڈبا گئیں اور وہ رو پڑے ، انھوں نے عرض کیا : آپ پر میرے ماں باپ قربان ہوں آپ کے بدلے ہمارے ماں باپ ، ہماری جانیں اور ہمارے اموال حاضر ہیں۔ پھر حضور اکرم (صلی اللہ علیہ وآلہ وسلم) نیچے اتر کر تشریف لے گئے اس کے بعد اس منبر پر قیامت تک نہیں کھڑے ہوئے ۔ (مصنف ابن ابی شیبۃ)