18838 ۔۔۔ عبید اللہ بن عبداللہ بن عتبہ سے مروی ہے میں حضرت عائشۃ صدیقہ (رض) کے پاس آیا ۔ میں نے عرض کیا : مجھے رسول اللہ (صلی اللہ علیہ وآلہ وسلم) کے مرض کے بارے میں بتایئے ۔ آپ (رض) نے فرمایا : ہاں ۔ رسول اللہ (صلی اللہ علیہ وآلہ وسلم) مریض ہوئے، پھر بوجھل ہوگئے اور آپ پر بےہوشی طاری ہوگئی پھر ہوش میں آئے تو فرمایا : لگن (ٹب) میں میرے لیے پانی بھر دو ، ہم نے آپ کے حکم کی تعمیل ارشاد کی ۔ آپ (صلی اللہ علیہ وآلہ وسلم) نے غسل کیا پھر بڑی مشقت کے ساتھ اٹھنے لگے تو پھر بےہوش ہوگئے ۔ پھر ہوش میں آئے اور فرمایا : میرے لیے پانی بھر دو ۔ ہم نے بھر دیا پھر آپ کے غسل فرمایا ۔ پھر بڑی مشکل اور تکلیف کے ساتھ اٹھنے کی کوشش فرمائی اور پھر بےہوش ہوگئے ۔ پھر ہوش میں آکر فرمایا : میرے لیے پانی بھر دو ۔ ہم نے بھر دیا ۔ آپ نے غسل فرمایا اور پھر اٹھنے کی کوشش میں بےہوش ہوگئے ۔ پھر ہوش میں آئے تو پوچھا : کیا میرے پیچھے سے لوگوں نے نماز پڑھ لی ہے ؟ ہم نے عرض کیا : نہیں یا رسول اللہ ! وہ آپ ہی کا انتظار فرما رہے ہیں۔ حضرت عائشۃ صدیقہ (رض) فرماتی ہیں : لوگ سر ڈالے رسول اللہ (صلی اللہ علیہ وآلہ وسلم) کی انتظار میں تھے کہ آپ آکر ان کو عشاء کی نماز پڑھائیں ، چنانچہ آپ (صلی اللہ علیہ وآلہ وسلم) نے ایک قاصد سیدنا حضرت ابوبکر صدیق (رض) کے پاس بھیجا کہ وہ نماز پڑھا دیں ۔ قاصد نے ان کو خبر دی کہ رسول اللہ (صلی اللہ علیہ وآلہ وسلم) آپ کو حکم دے رہے ہیں کہ آپ لوگوں کو نماز پڑھا دیں سیدنا حضرت ابوبکر صدیق (رض) نے سیدنا حضرت عمر ابن خطاب (رض) کو فرمایا : اے عمر تم نماز پڑھا دو ۔ سیدنا حضرت عمر ابن خطاب (رض) نے فرمایا : آپ زیادہ حقدار ہیں۔ کیونکہ پیغام آپ کو ملا ہے رسول اللہ (صلی اللہ علیہ وآلہ وسلم) کی طرف سے ۔ چنانچہ سیدنا حضرت ابوبکر صدیق (رض) نے لوگوں کو عشاء کی نماز پڑھائی ۔ پھر (اگلے روز) رسول اللہ (صلی اللہ علیہ وآلہ وسلم) نے اپنے مرض میں کچھ تخفیف محسوس کی تو ظہر کی نماز پڑھانے کے لیے حضرت عباس (رض) اور ایک دوسرے آدمی کے درمیان ان کے سہارے کے ساتھ نکلے ، ان دونوں کو آپ نے فرمایا : مجھے ابوبکر کی دائیں طرف بٹھا دو ۔ سیدنا حضرت ابوبکر صدیق (رض) نے آپ کی آواز سنی تو (نماز ہی میں) پیچھے کو ہٹنے لگے ۔ آپ (صلی اللہ علیہ وآلہ وسلم) نے ان کو حکم دیا کہ اپنی جگہ ٹھہرے رہیں ۔ چنانچہ دونوں حضرات نے آپ کو سیدنا حضرت ابوبکر صدیق (رض) کے دائیں طرف بٹھا دیا ۔ پس سیدنا حضرت ابوبکر صدیق (رض) آپ (صلی اللہ علیہ وآلہ وسلم) کی اقتداء کر رہے تھے اور آپ بیٹھے ہوئے ان کو نماز پڑھا رہے تھے جبکہ پیچھے لوگ سیدنا حضرت ابوبکر صدیق (رض) کی اقتداء کر رہے تھے ۔ راوی عبید اللہ کہتے ہیں یہ سن کر میں سیدنا حضرت ابوبکر صدیق (رض) کے پاس آیا اور عرض کیا : مجھے حضرت عائشۃ صدیقہ (رض) نے بیان کیا ہے میں آپ کو سناؤں ؟ آپ نے سنانے کا حکم دیا تو میں نے ساری روایت ان کو سنائی آپ نے کسی بات پر انکار نہیں فرمایا سوائے اس کے کہ یہ پوچھا : عائشہ نے تم کو دوسرے شخص کے بارے میں بتایا وہ کون تھا ؟ میں نے کہا نہیں ، فرمایا وہ علی (رض) تھے ۔ (رواہ ابن ابی شیبۃ)