18841 ۔۔۔ رسول اللہ (صلی اللہ علیہ وآلہ وسلم) کے غلام ابو مویہبہ سے مروی ہے کہ رسول اللہ (صلی اللہ علیہ وآلہ وسلم) حجۃ التمام (حجۃ الوداع) کے بعد مدینہ کی طرف واپس آئے ، راستے میں آپ حلال ہوگئے ، آپ (صلی اللہ علیہ وآلہ وسلم) نے لوگوں کا ایک لشکر ترتیب دیا جن پر حضرت اسامہ بن زید کو امیر بنایا ، اور ان کو حکم دیا کہ اردن شام کی چوٹیوں کی طرف آبل الزیت مقام پر پہنچیں ، منافقوں نے اسامہ کے متعلق اعتراضات شروع کیے ۔ حضور اکرم (صلی اللہ علیہ وآلہ وسلم) نے ان کے اعتراضات مسترد کردیئے اور فرمایا اسامہ اس منصب کے لیے بالکل موضوع ہے ، اگر تم ان کے بارے میں اعتراض کرتے ہو تو پہلے ان کے والد کے بارے میں بھی کرچکے ہو اور وہ بھی اس منصب کے اہل تھے ، پھر ہر طرف نبی (صلی اللہ علیہ وآلہ وسلم) کے واپسی سفر اور آپ کی بیماری کی خبریں پھیل گئیں ، پھر بنی اسد کے قبائل میں طلیحہ نے نبوت کا دعوی کردیا اس وقت تک نبی (صلی اللہ علیہ وآلہ وسلم) کو بیماری سے افاقہ ہوگیا تھا ۔ پھر اس کے بعد حضور اکرم (صلی اللہ علیہ وآلہ وسلم) محرم میں اس مرض میں مبتلا ہوگئے جس میں آخر کار آپ کی وفات ہوئی ۔ (سیف ، ابن عساکر)