19042 ۔۔۔ جس نے میرے اس وضو کی طرح وضو کیا پھر کھڑا ہوا اور ظہر کی نماز ادا ک تو اس کے فجر وظہر کے درمیان کے تمام گناہ معاف ہوجائیں گے ۔ پھر عصر کی نماز ادا کی تو اس کے ظہر سے عصر کے گناہ معاف ہوجائیں گے ۔ پھر مغرب کی نماز ادا کی تو عصر سے مغرب تک کے گناہ معاف ہوجائیں گے پھر عشاء کی نماز ادا کی تو مغرب سے عشاء کے درمیانی گناہ معاف ہوجائیں گے ۔ پھر شاید وہ رات بسر کرے اور لوٹ پوٹ ہوتا رہے ۔ (اور اگر تہجد بھی پڑھے تو کیا ہی کہنا) پھر کھڑا ہو وضو کرے اور صبح کی نماز پڑھے تو اس کے عشاء سے فجر تک کے گناہ معاف ہوجائیں گے ، یہی ہیں وہ نیکیاں جو گناہوں کو مٹا دیتی ہیں۔ (آیت)” ان الحسنات یذھبن السئیات “۔ صحابہ کرام رضوان اللہ تعالیٰ عنہم اجمعین نے عرض کیا : پھر باقیات صالحات (باقی رہنے والی نیکیاں) کیا ہیں ؟ فرمایا : وہ تو ” لا الہ الا اللہ و سبحان اللہ والحمد للہ واللہ اکبر ولاحول ولا قوۃ الا باللہ “۔ (مسند احمد ، مسند ابی یعلی ، شعب الایمان للبیہقی عن عثمان (رض))