21558 ۔۔۔ اے لوگو ! شمس وقمر اللہ کی نشانیوں میں سے دو نشانیاں ہیں۔ یہ دونوں کسی انسان کی موت کی وجہ سے گرہن نہیں ہوتے ، جب تم ایسی کوئی چیز دیکھو تو نماز میں مشغول ہوجاؤ جب تک کہ گرہن ختم نہ ہو ، تم سے جس چیز کا بھی وعدہ کیا جاتا ہے اس کو آج میں نے اپنی نماز میں دیکھ لیا ہے ، جب تم نے مجھے پیچھے ہٹتا دیکھا تھا تب میرے سامنے جہنم پیش کی گئی تھی تو میں اس خوف سے پیچھے ہٹتا تھا کہ اس کی لپٹ مجھے نہ جھلسا دے ۔ حتی کہ میں پکار اٹھا اے پروردگار ! اور میں ان میں تھا پھر میں نے ایک ڈنڈے والے کو دیکھا جو حاجیوں کا مال اپنے ڈنڈے سے کھینچ لیتا تھا اگر اس کی حرکت پکڑی جاتی تو کہتا کہ میرے ڈنڈے میں پھنس گیا تھا اور اگر کسی کو پتہ نہ چلتا تو وہ مال لے اڑتا تھا ، نیز میں نے جہنم میں ایک بلی والی کو دیکھا جس نے بلی کو باندھا اور اس کو کھلایا نہ پلایا اور نہ اس کو کھلا چھوڑا کہ وہ گھاس پھونس کھا لیتی حتی کہ وہ بھوک سے مرگئی ، میرے پاس جنت لائی گئی اور یہ وہ وقت تھا جب تم نے مجھے آگے بڑھتے دیکھا تھا حتی کہ میں اپنی جگہ کھڑا ہوا اور اوپر اپنا ہاتھ آگے بڑھا دیا تاکہ جنت سے کچھ پھل لے لوں تاکہ تم بھی ان کو دیکھو لیکن پھر خیال آیا کہ ایسا نہ کروں (مسند احمد ، مسلم عن جابر (رض))