21578 ۔۔۔ شمس وقمر یہ اللہ کی نشانیوں میں سے دو نشانیاں ہیں جب تم کسی ایک کو گہن لگا دیکھو تو اللہ کے ذکر کی طرف دوڑو ، قسم ہے اس ذات کی جس کے ہاتھ میں محمد کی جان ہے جنت مجھ سے اس قدر قریب کردی گئی تھی اگر میں ہاتھ بڑھاتا تو اس میں سے کوئی خوشہ اٹھالیتا ، اور جہنم بھی اس قدر قریب ہوگئی تھی کہ میں پیچھے ہٹنے لگا اس ڈر سے کہ تم کو وہ لپیٹ میں نہ لے لے ، میں نے جہنم میں ایک حمیری سیاہ فام طویل قامت عورت دیکھی جس کو ایک بلی کی وجہ سے عذاب دیا جا رہا تھا ، اس نے بلی کو باندھ دیا تھا نہ اس کو چھوڑا کہ وہ گھوم پھر کر گھانس پھونس کھا کر گذارہ کرلیتی اور نہ اس کو کھلایا پلایا، حتی کہ وہ مرگئی ، میں نے اس کو دیکھا کہ وہ بلی اس عورت کو سامنے سے نوچ رہی ہے اگر عورت منہ پھیرتی ہے تو اس کو پیچھے سر کی طرف سے نوچتی ہے میں نے جہنم میں بنی الدعدع کا ایک شخص بھی دیکھا جو اپنے ٹیرھے منہ والی لاٹھی سے چوری کرتا تھا ، میں نے جہنم میں مڑے ہوئے منہ والی لاٹھی سے چوری کرنے والے (ایک دوسرے) شخص کو بھی دیکھا جو اپنی لاٹھی سے حاجیوں کا سامان چوری کرتا تھا ، اگر لوگ اس کی حرکت کو دیکھ لیتے تو کہتا میں نے چوری نہیں کی بلکہ میری لاٹھی میں تمہارا سامان پھنس گیا تھا ، وہ اسی لاٹھی پر ٹیک لگائے ہوئے جہنم میں ہانپ رہا تھا اور کہہ رہا تھا میں لاٹھی کے ساتھ چوری کرتا تھا ۔ (مسند احمد ، النسائی وابن جریر عن ابن عمرو (رض))