22258 ۔۔۔ عکرمہ بن خالد ایک ثقہ راوی سے روایت کرتے ہیں کہ ایک مرتبہ سیدنا حضرت عمر ابن خطاب (رض) نے جابیہ مقام میں لوگوں کو عشاء کی نماز پڑھائی اور قرات بالکل نہیں کی حتی کہ فارغ ہوئے اور اپنے حجرہ میں داخل ہوگئے اتنے میں عبدالرحمن بن عوف (رض) اٹھے اور حجرے کے اردگرد چکر لگایا اور کھنکھارے تاکہ سیدنا حضرت عمر ابن خطاب (رض) کو ان کی آمد کا پتہ چل جائے نیز اس کا بھی انھیں علم ہوجائے کہ عبدالرحمن کو ان سے کوئی ضروری کام ہے۔ چنانچہ آپ (رض) نے فرمایا : یہ کون ہے ؟ جواب ملا ! میں عبدالرحمن بن عوف (رض) فرمایا : کیا آپ کو کوئی کام ہے حضرت عبدالرحمن (رض) نے اثبات میں جواب دیا ، سیدنا حضرت عمر ابن خطاب (رض) نے اندر داخل ہونے کا حکم دیا چنانچہ حضرت عبدالرحمن اندر داخل ہوئے اور کہا مجھے خبر دیجئے کہ جو کچھ آپ نے ابھی ابھی (نماز میں) کیا ہے کیا رسول اللہ (صلی اللہ علیہ وآلہ وسلم) نے ایسا کرنے کا حکم دیا ہے یا پھر آپ نے اپنی طرف سے ایسا کیا ہے آپ (صلی اللہ علیہ وآلہ وسلم) نے فرمایا : بھلا میں نے کیا کیا ہے ؟ عرض کیا کہ آپ نے عشاء کی نماز میں قرات نہیں کی فرمایا : کیا واقعی میں نے قرات نہیں کی ؟ عرض کیا : جی ہاں آپ نے قرات نہیں کی ۔ فرمایا : میں بھول گیا ہوں چنانچہ میں نے شام سے ایک قافلہ تیار کیا حتی کہ میں مدینہ پہنچ گیا ۔ پھر آپ (رض) نے موذن کو حکم دیا اس نے دوبارہ نماز کھڑے کی اور آپ (رض) نے لوگوں کو دوبارہ نماز پڑھائی ، جب نماز سے فارغ ہوئے تو لوگوں سے خطاب کیا اور فرمایا : جو آدمی نماز میں قرات نہیں کرتا اس کی نماز نہیں ہوتی بلاشبہ جو کچھ مجھ سے ابھی ابھی سرزاد ہوا وہ بھولے سے ہوا ۔ چنانچہ میں نے (نماز میں کھڑے کھڑے محض خیالات کی دنیا میں) شام سے سازوسامان سے لدا ہوا ایک قافلہ تیار کیا حتی کہ میں مدینہ پہنچ گیا اور وہاں سب کچھ تقسیم کردیا ۔ (رواہ عبدالرزاق)