2226 ۔۔۔ اے ابو طلحہ ! مجھے کیا مانع ہے، کہ میں یوں خوشی نہ کروں ؟ جبکہ جبرائیل (علیہ السلام) ابھی ابھی مجھ سے جدا ہو کر گئے ہیں۔ انھوں نے کہا اے محمد ! آپ کے رب نے مجھے آپ کی طرف بھیجا ہے۔ اور یہ فرمایا آپ کی امت کا جو فرد آپ پر ایک درود بھیجے گا۔ اللہ اس کے لیے دس نیکیاں لکھیں گے اور دس برائیاں مٹا دیں گے اور اس کے دس درجات بلند فرما دیں گے۔ اور اس درود کے عرش باری تک پہنچنے کے لیے کوئی انتہا نہیں ہوگی۔ اور وہ درود جب بھی کسی فرشتہ کے پاس سے گذرے گا وہ کہے گا اس کے قائل کے لیے بھی دعائے رحمت کرو۔ جس طرح اس نے محمد پر رحمت کی دعا کی۔ الخطیب بروایت انس (رض) عن ابی طلحہ۔
فرمایا کہ ابو الجنید الحسین بن خالد الضریر اس روایت میں متفرد تنہا ہیں۔ اور چونکہ وہ ثقہ نہیں ہیں لہٰذا ان کے تفرد پر اعتبار نہیں کیا جاسکتا۔