22391 ۔۔۔ سالم بوار کہتے ہیں کہ ایک مرتبہ ہم حضرت مسعود انصاری (رض) کی خدمت میں ان کے گھر میں حاضر ہوئے ہم نے ان سے عرض کیا کہ ہمیں رسول اللہ (صلی اللہ علیہ وآلہ وسلم) کی نماز کے متعلق بتائیے چنانچہ آپ (رض) کھڑے ہوگئے اور ہمارے سامنے نماز پڑھنے لگے جب انھوں نے رکوع کیا تو ہاتھوں کو گھٹنوں پر رکھا اور انگلیوں کو گھٹنوں سے نیچے کرلیا اور کہنیوں کو پہلو سے دور رکھا حتی کہ جس کے ہر عضو کو (کمر بازو اور ٹانگوں کو) بالکل سیدھا رکھا پھر سر اوپر اٹھایا اور ” سمع اللہ لمن حمدہ “ کہا اور بالکل سیدھے کھڑے ہوگئے پھر انھوں نے اسی طرح عمدگی سے سجدہ کیا اور یوں دو رکعتیں پڑھیں جب نماز سے فارغ ہوئے تو فرمایا : میں نے رسول اللہ (صلی اللہ علیہ وآلہ وسلم) کو اسی طرح نماز پڑھتے دیکھا ہے۔ (رواہ ابن ابی شیبۃ)