22492 ۔۔۔ عبداللہ بن حارث کہتے ہیں ایک مرتبہ میں حضرت عبداللہ ابن عباس (رض) کے ساتھ حضرت معاویہ (رض) کے پاس گیا چنانچہ حضرت معاویہ (رض) نے حضرت عبداللہ ابن عباس (رض) کو اپنے قریب بیٹھایا اور پھر کہا : لوگ عصر کے بعد کیسی دو رکعتیں پڑھتے ہیں ، حضرت عبداللہ ابن عباس (رض) نے جواب دیا : لوگوں کو ابن زبیر فتوی دیتے ہیں۔ چنانچہ حضرت معاویہ (رض) نے ابن زبیر (رض) کے پاس قاصد بھیج کر ان دو رکعتوں کے متعلق پوچھا : انھوں نے جواب دیا مجھے حضرت عائشہ نے خبر دی ہے کہ رسول (صلی اللہ علیہ وآلہ وسلم) عصر کے بعد دو رکعتیں پڑھے تھے ۔ چنانچہ معاویہ (رض) نے قاصد کو حضرت عائشہ (رض) کے پاس بھیجا انھوں نے جواب دیا کہ اس بارے میں مجھے ام سلمہ (رض) نے بتایا ہے چنانچہ قاصد حضرت ام سلمہ (رض) کے پاس گیا اور ان سے عصر کے بعد کی دو رکعتوں کی حقیقت دریافت کی انھوں نے جواب دیا کہ : اللہ تبارک وتعالیٰ عائشہ (رض) پر رحم فرمائے میں نے تو انھیں یہ خبر دی تھی کہ رسول (صلی اللہ علیہ وآلہ وسلم) نے ان دو رکعتوں سے منع فرمایا تھا ۔ چنانچہ ایک مرتبہ رسول (صلی اللہ علیہ وآلہ وسلم) نے میرے گھر میں ظہر کی نماز کے لیے وضو کیا اور آپ (صلی اللہ علیہ وآلہ وسلم) کے پاس مہاجرین کافی تعداد میں جمع تھے اور اس سے پہلے آپ (صلی اللہ علیہ وآلہ وسلم) نے ایک عامل کو صدقات کی وصولی کے لیے بھیجا تھا اور اس نے تاخیر کردی تھی اسی اثناء میں دروازے پر دستک ہوئی ۔ آپ (صلی اللہ علیہ وآلہ وسلم) باہر تشریف لے گئے اور ظہر کی نماز پڑھی نماز کے بعد آپ (صلی اللہ علیہ وآلہ وسلم) مال تقسیم کرنے کے لیے بیٹھ گئے یہاں تک کہ عصر کے وقت فارغ ہوئے آپ (صلی اللہ علیہ وآلہ وسلم) کا بلال (رض) نے دیکھا تو انھوں نے اقامت کہہ کر عصر کی نماز کھڑی کردی اور آپ (صلی اللہ علیہ وآلہ وسلم) نے عصر کی نماز پڑھی پھر میرے گھرپر تشریف لائے اور دو رکعتیں پڑھیں۔ میں نے آپ (صلی اللہ علیہ وآلہ وسلم) سے ان رکعتوں کے بارے میں دریافت کیا تو آپ (صلی اللہ علیہ وآلہ وسلم) نے فرمایا : یہ دو رکعتیں میں ظہر کے بعد پڑھتا تھا جنہیں میں نہیں پڑھ سکا ہوں اور اب عصر کے بعد پڑھ رہا ہوں مجھے ناگوار گزرا کہ میں یہ دو رکعتیں مسجد میں پڑھوں درآں حالیکہ لوگ مجھے دیکھ رہے ہوں لہٰذا میں نے تمہارے پاس آ کر پڑھی ہیں (رواہ ابن جریر)