22872 ۔۔۔ سیدنا حضرت علی المرتضی (رض) کی روایت ہے کہ حضرت معاذ (رض) نے اپنی قوم کو فجر کی نماز پڑھائی اور اس میں سورت بقرہ پڑھی ان کے پیچھے ایک اعرابی تھا اس نے اپنے ہمراہ ایک اونٹنی لائی تھی (جو مسجد کے باہر تھی) جب دوسری رکعت شروع ہوئی تو اعرابی نے الگ اپنے طور پر جلدی جلدی پڑھ دی اور معاذ (رض) کو چھوڑ دیا صحابہ کرام رضوان اللہ تعالیٰ عنہم اجمعین نے حضور اکرم (صلی اللہ علیہ وآلہ وسلم) سے اس اعرابی کی شکایت کی آپ (صلی اللہ علیہ وآلہ وسلم) نے اس سے ایسا کرنے کی وجہ دریافت کی تو کہنے لگا : مجھے اپنی اونٹنی کا ڈر تھا کہ کہیں چلی نہ جائے اور میرے گھر پر میرا عیال ہے جن کی میں نگرانی کرتا ہوں اس پر حضور اکرم (صلی اللہ علیہ وآلہ وسلم) نے حضرت معاذ (رض) کو سختی سے تاکید کی کہ لوگوں کو کمزور تر آدمی کی سی نماز پڑھایا کرو چونکہ مقتدیوں میں بچے بھی ہوتے ہیں بوڑھے بھی ہوتے ہیں اور حاجت مند بھی ہوتے ہیں تم لوگوں کو فتنہ میں مبتلا مت کرو ۔ (رواہ ابن منیع)