22927 ۔۔۔ حضرت جابر (رض) کی روایت ہے کہ ایک مرتبہ ایک انصاری نوجوان اپنی اونٹنی کے لیے چارہ لایا اتنے میں حضرت معاذ بن جبل (رض) نے عشاء کی نماز کھڑی کردی نوجوان نے چارہ وہیں چھوڑا ، وضو کیا اور نماز میں حاضر ہوگیا حضرت معاذ (رض) نے سورت بقرہ شروع کردی نوجوان نے الگ سے اپنی نماز پڑھی ، حضرت معاذ (رض) کو وہیں چھوڑا اور اپنی اونٹنی کو چار دیے چل پڑا جب حضرت معاذ (رض) ان سے فارغ ہوئے تو نوجوان ان کے پاس آیا اور انھیں برا بھلا کہا ، پھر بولا بخدا میں ضرور حضور اکرم (صلی اللہ علیہ وآلہ وسلم) کے پاس جاؤں گا اور تمہاری شکایت کروں گا حضرت معاذ (رض) نے کہا : میں حضور اکرم (صلی اللہ علیہ وآلہ وسلم) کے پاس جاؤں گا اور تمہاری شکایت کروں گا ، چنانچہ صبح کو دونوں حضور اکرم (صلی اللہ علیہ وآلہ وسلم) کی خدمت میں حاضر ہوئے ، پہلے حضرت معاذ (رض) نے اپنا موقف بیان کیا پھر نوجوان بولا : ہم مصروف کار لوگ ہیں اور دن بھر کام کاج میں مشغول رہتے ہیں اور پھر اس نے ہمیں لمبی نماز پڑھائی اور سورت بقرہ شروع کردی حضور اکرم (صلی اللہ علیہ وآلہ وسلم) نے فرمایا : اے معاذ ! کیا تم فتنے کا باعث بننا چاہتے ہو ؟ جب لوگوں کو امامت کراؤتو ” سبح اسم ربک الاعلی واللیل اذا یغشی واقرا باسم ربک ، والضحی “۔ ان جیسی دوسری سورتیں پڑھا کرو عبداللہ عبید اللہ بن عمر (رض) کہتے ہیں پھر حضور اکرم (صلی اللہ علیہ وآلہ وسلم) نے نوجوان کو بلایا اور حضرت معاذ (رض) سے کہا : اللہ تبارک وتعالیٰ سے دعا مانگو چنانچہ حضرت معاذ (رض) نے دعا کی پھر نوجوان سے کہا : تم دعا مانگو اس نے جواب دیا : مجھے آپ کی بات سمجھ میں نہیں آئی لیکن بخدا ! دشمن سے میرا مقابلہ ہوگیا تو میں اللہ تبارک وتعالیٰ کو ضرور سچ کر دکھاؤں چنانچہ دشمن سے اس کا مقابلہ ہوگیا اور شہادت کی موت پائی اس پر حضور اکرم (صلی اللہ علیہ وآلہ وسلم) نے فرمایا اللہ تعالیٰ نے سچ فرمایا اور اسے سچا کر دکھایا ۔ (رواہ عبدالرزاق، وھو صحیح)