23267 ۔۔۔ حضرت ابوہریرہ (رض) کی روایت ہے کہ حضور اکرم (صلی اللہ علیہ وآلہ وسلم) کے ساتھ دو آدمی رہا کرتے تھے ان میں سے ایک تو آپ (صلی اللہ علیہ وآلہ وسلم) سے جدا ہی نہیں ہوتا تھا اور اس کا کوئی زیادہ عمل نہیں دیکھا گیا دوسرا اتنازیادہ آپ (صلی اللہ علیہ وآلہ وسلم) کے ساتھ نہیں دیکھا جاتا تھا اور نہ ہی اس کا کوئی زیادہ عمل تھا ۔ بہرحال جو رسول اللہ (صلی اللہ علیہ وآلہ وسلم) سے جدا نہیں ہوتا تھا اس نے عرض کیا : یا رسول اللہ (صلی اللہ علیہ وآلہ وسلم) نمازیوں نے نماز کا اجر وثواب سمیٹ لیا روزہ داروں نے روزوں کا اجر وثواب سمیٹ لیا اور میرے پاس اللہ اور اللہ کے رسول کی محبت کے سوا کچھ نہیں ۔ آپ (صلی اللہ علیہ وآلہ وسلم) نے ارشاد فرمایا : جس عمل کی تم نے نیت کی ہے اس کا اجر وثواب تمہارے لیے ہے اور تمہارا حشر اسی کے ساتھ ہوگا ، جس سے تمہیں محبت ہے رہی بات دوسرے کی وہ مرگیا تو نبی کریم (صلی اللہ علیہ وآلہ وسلم) نے اپنے صحابہ کرام رضوان اللہ تعالیٰ عنہم اجمعین سے کہا : کیا تمہیں معلوم ہے کہ اللہ تعالیٰ فلاں شخص کو جنت میں داخل کرے گا ؟ صحابہ کرام رضوان اللہ تعالیٰ عنہم اجمعین نے اس پر تعجب کیا اور کہا : وہ تو ایسا نہیں معلوم ہوتا ۔ چنانچہ بعض صحابہ کرام رضوان اللہ تعالیٰ عنہم اجمعین اس آدمی کی بیوی کے پاس گئے اور اس سے اس کے مخفی عمل کے بارے میں پوچھا : بیوی نے جواب دیا : وہ دن میں ہو یا رات میں خواہ جس حال میں ہو موذن کو جب ” اشھد ان لا الہ الا اللہ “۔ کہتے سنتا تو جواب میں یہی کلمہ دہراتا اور کہتا میں اس کا اقرار کرتا ہوں اور جو اس کا انکار کرے میں اس کی تکفیر کرتا ہوں اور جب موذن ” اشھد ان محمدا رسول اللہ “۔ کہتا تو وہ بھی یہی کلمہ دہراتا چنانچہ صحابہ کرام رضوان اللہ تعالیٰ عنہم اجمعین بولے وہ اس عمل کی وجہ سے جنت میں داخل ہوگا ۔ (رواہ ابو الشیخ) کلام : ۔۔۔ اس حدیث کی سند میں عبدالرحمن بن ثابت بن ثوبان ہے اس کی متعلق امام احمد بن حنبل (رح) کا کہنا ہے کہ یہ غیر معتبر روای ہے۔