23322 ۔۔۔ حضرت ابو سلمہ بن سعد بن عبدالرحمن بن عوف (رض) روایت نقل کرتے ہیں کہ ایک مرتبہ جمعہ کے دن حضرت ابوذر غفاری (رض) حضرت ابی بن کعب (رض) کے پہلو میں بیٹھے ہوئے تھے درآنحالیکہ حضور اکرم (صلی اللہ علیہ وآلہ وسلم) خطبہ ارشاد فرما رہے تھے دوران خطبہ آپ (صلی اللہ علیہ وآلہ وسلم) نے ایک آیت تلاوت کی جسے حضرت ابوذر (رض) نے اس سے قبل نہیں سنا تھا ۔ حضرت ابوذر (رض) نے حضرت ابی (رض) سے پوچھا یہ آیت کب نازل ہوئی ہے ؟ حضرت ابی (رض) نے کوئی جواب نہ دیا ۔ جب نماز کھڑی کی گئی تو حضرت ابوذر (رض) نے حضرت ابی (رض) سے پوچھا : تم نے میرے سوال کا جواب کیوں نہیں دیا تھا ؟ حضرت ابی (رض) نے کہا جمعہ کے خطبہ کے دوران آپ جو بات بھی کریں گے وہ لغو سمجھی جائے گئی ، چنانچہ حضرت ابوذر (رض) نماز کے بعد حضور اکرم (صلی اللہ علیہ وآلہ وسلم) کی خدمت میں حاضر ہوئے اور اس کا تذکرہ کیا آپ (صلی اللہ علیہ وآلہ وسلم) نے فرمایا : ابی نے سچ کہا اس پر حضرت ابوذر (رض) نے کہا : میں اللہ تبارک وتعالیٰ سے بخشش کا خواستگار ہوں اور توبہ کرتا ہوں حضور اکرم (صلی اللہ علیہ وآلہ وسلم) نے فرمایا : یا اللہ ! ابو ذر (رض) کی مغفرت کر دے اور اس کی توبہ قبول فرما ۔ (رواہ الفرویانی والدیلمی)