23451 ۔۔۔ ام ھانی بنت ابی طالب (رض) کہتی ہیں جب رسول کریم (صلی اللہ علیہ وآلہ وسلم) نے مکہ فتح کیا تو قبیلہ بنی مخزوم میں سے میرے دوست ، والی ، رشتہ دار (دیور) بھاگ کر میرے پاس آئے ۔ میں نے انھیں اپنے گھر میں چھپا دیا اتنے میں میرے بھائی علی بن ابی طالب (رض) ادھر آنکلے اور کہنے لگے بخدا میں تو انھیں ضرور قتل کروں گا میں نے دروازہ پر تالہ لگا دیا پھر مکہ میں رسول اللہ (صلی اللہ علیہ وآلہ وسلم) کی خدمت میں حاضر ہوئی ، آپ (صلی اللہ علیہ وآلہ وسلم) اس وقت ایک ٹب میں غسل کر رہے تھے ٹب میں آٹے کے نشانات تھے جب کہ فاطمہ (رض) نے چادر تان کر آپ (صلی اللہ علیہ وآلہ وسلم) کے آگے پردہ کر رکھا تھا ، جب آپ (صلی اللہ علیہ وآلہ وسلم) غسل سے فارغ ہوئے اور اپنے بدن پر ایک کپڑا لپیٹا اور پھر نماز چاشت کی آٹھ رکعات پڑھیں پھر میری طرف متوجہ ہو کر فرمایا : ام ھانی مرحبا خوش آمدید بتائیے کیسے آنا ہوا ؟ میں نے عرض کیا یا رسول اللہ (صلی اللہ علیہ وآلہ وسلم) میرے دو سسرالی رشتہ دار بھاگ کر میرے پاس (پناہ کے لئے) آئے ہیں اور اب علی آئے ہیں اور کہتے ہیں انھیں قتل کروں گا آپ (صلی اللہ علیہ وآلہ وسلم) نے فرمایا : ایسا نہیں ہوگا : جسے تم نے پناہ دی اسے ہم نے بھی پناہ دی جسے تم نے امن دیا اسے ہم نے بھی امن دیا ۔ (رواہ ابن ابی شیبۃ وابن جریر)