23481 ۔۔۔ ” مسند ابن عباس (رض) “ (نبی کریم (صلی اللہ علیہ وآلہ وسلم) نے سیدنا حضرت علی المرتضی (رض) سے فرمایا) اے ابوالحسن کیا میں تمہیں کچھ کلمات نہ سکھاؤں جن سے اللہ تعالیٰ تمہیں نفع پہنچائے اور جسے تم سکھاؤ اسے بھی نفع پہنچائے اور جو کچھ تم پڑھو وہ تمہارے سینے میں پختہ ہوجائے چنانچہ جمعہ کی شب اگر تم سے ہو سکے تو رات کے آخری تہائی حصہ میں اٹھو چونکہ یہ وقت اللہ کے دربار میں حاضری کا وقت ہے اور اس وقت دعا قبول ہوتی ہے چنانچہ میرے بھائی یعقوب (علیہ السلام) نے اپنے بیٹوں سے کہا تھا : ” سوف استغفرلکم ربی “۔ یعنی عنقریب میں اپنے رب سے تمہارے لیے استغفار کروں گا یعقوب (علیہ السلام) نے یہ بات کہی تھی تاکہ جمعہ کی شب آجائے اگر تمہیں اس وقت اٹھنے کی طاقت نہ ہو تو درمیان رات میں اٹھ جاؤ وہ نہیں تو اول رات میں کھڑے ہوجاؤ اور چار رکعات پڑھو بایں طور کہ پہلی رکعت میں سورت فاتحہ اور سورت یس پڑھو دوسری رکعت میں سورت فاتحہ اور حم الدخان پڑھو۔ تیسری رکعت میں سورت فاتحہ اور الم تنزیل السجدہ پڑھو اور چوتھی رکعت میں سورت فاتحہ اور تبارک الذی پھر جب تشہد سے فارغ ہوجاؤ تو اللہ تعالیٰ کی حمد وثناء کرو اور مجھ پر درود بھیجو پھر سارے انبیاء پر درود سلام بھیجو مومن مردوں اور مومن عورتوں کے لیے استغفار کرو اور جو تمہارے مسلمان بھائی دنیا سے رخصت ہوچکے ہیں ان کے لیے بھی استغفار کرو پھر اس کے آخر میں یہ دعا پڑھو۔ ” اللہم ارحمنی بترک المعاصی وارزقنی حسن النظر فیما یرضیک عنی اللہم یدیع السموات والارض ذوالجلال والاکرام والعزۃ التی لا ترم اسنالک یا اللہ یا رحمن بجلالک ونور وجھک ان تلزم قلبی حفظ کتابک کما علمتنی وارزقنی ان اتلوہ علی النحو الذی یرضیک عنی ، اللہم یدیع السموت والارض ذوالجلال والاکرام والعزۃ التی لا ترام واسئالک یا اللہ یا رحمن بجلالک ونور وجھک ان تنور بکتابک بصری وان تطلق بہ لسانی وان تفرج بہ عن قلبی وان تشرح بھا صدری وان تعمل بہ بدنی فانہ لا یعنی علی الحق غیر ان ولا یوتیہ الا انت ولا حول ولا قوۃ الا باللہ العلی العظیم “۔ ” یا اللہ ترک گناہ سے مجھ پر رحم فرما اور مجھے حسن نظر عطا فرما جس کے ذریعے تو مجھ سے راضی ہوجائے اے اللہ ! آسمانوں اور زمین کے پیدا کرنے والے عزت و جلال والے جس کا ارادہ نہیں کیا جاسکتا میں تجھ سے سوال کرتا ہوں ، یا اللہ یا رحمن تیری جلال اور تیری ذات کے نور کے واسطے سے کہ تو میرے دل میں اپنی کتاب کا حفظ پختہ کر دے جس طرح کہ تو نے مجھے اس کا علم عطا کیا ہے اور مجھے اس طریقہ پر پڑھنے کی توفیق عطا فرما جس سے تو مجھ سے راضی رہے ۔ اے اللہ آسمانوں اور زمین کو پیدا کرنے والے ایسی عزت اور جلال وشان والے جس کا ارادہ نہیں کیا جاسکتا یا اللہ یا رحمن تو اپنے جلال شان اور اپنی ذات کے نور کے واسطے اپنی کتاب کے ذریعے میری بصر کو منور کر دے اور اس کے ذریعے میری زبان کو چلا دے میرے دل کی گرہیں کھول دے اور میرے سینے کو کھول دے اور میرے بدن کو عمل کی توفیق عطا فرما ، بلاشبہ تیرے سوا حق پر میری مدد کرنے والا کوئی نہیں اور اس کام کو صرف تو ہی کرسکتا ہے ولا حول ولا قوۃ الا باللہ۔ ے ابو الحسن ! تین یا پانچ یا سات جمعہ میں ایسا کرو قسم اس ذات کی جس نے مجھے برحق مبعوث کیا ہے تمہاری یہ دعا کبھی در نہیں ہوگی ۔ (رواہ الترمذی وقال حسن غریب والطبرانی وابن السنی فی عمل یوم ولیلۃ والحاکم) کلام : ۔۔۔ ابن جوزی (رح) نے اس حدیث کو موضوعات میں شمار کیا ہے لیکن ان کی اس رائے کو قبول نہیں کیا گیا ۔ حافظ ذھبی کہتے ہیں : یہ حدیث منکر اور شاذ ہے مجھے خوف ہے کہ یہ کسی نے اپنی طرف سے نہ گھڑ لی ہو اس سب کے باوجود بخدا ! اس کی سند کی عمدگی نے ورطہ حیرت میں ڈال رکھا ہے۔