23500 ۔۔۔ ابن جریح روایت کرتے ہیں کہ مجاہد فرماتے ہیں کہ آیت کریمہ ” اخفتم ان یفتنکم الذین کفروا “۔ (یعنی اگر تمہیں خوف ہو کر کفار تمہیں فتنہ میں مبتلا کریں گے) اس دن نازل ہوئی جس دن نبی کریم (صلی اللہ علیہ وآلہ وسلم) مقام عسفان میں تھے جب کہ مشرکین مقام ضجنان میں دونوں فریق باہم مقابل تھے کہ حضور اکرم (صلی اللہ علیہ وآلہ وسلم) نے اپنے صحابہ کرام رضوان اللہ تعالیٰ عنہم اجمعین کو ظہر کی نماز چار رکعات پڑھائی رکوع سجود اور قیام سب نے اکٹھے مل کر کیا اسی دوران مشرکین نے مسلمانوں کے سازوسامان پر چھاپہ مارنا چاہا اور مسلمانوں کو قتل کرنا چاہا کہ اللہ عزوجل نے آیت ” فلتقم طائفۃ “۔ (یعنی ایک جماعت دشمن کے مدمقابل کھڑی رہے ) نازل فرمائی چنانچہ حضور اکرم (صلی اللہ علیہ وآلہ وسلم) نے عصر کی نماز پڑھی تو صحابہ کرام رضوان اللہ تعالیٰ عنہم اجمعین نے آپ (صلی اللہ علیہ وآلہ وسلم) کے پیچھے دو صفیں بنالیں سب صحابہ کرام رضوان اللہ تعالیٰ عنہم اجمعین نے آپ (صلی اللہ علیہ وآلہ وسلم) کے ساتھ توتکبیر تحریمہ کہی لیکن پہلی صف والوں نے آپ (صلی اللہ علیہ وآلہ وسلم) کے ساتھ سجدہ کیا اور دوسرے کھڑے رہے اور انھوں نے سجدہ نہ کیا حتی کہ حضور اکرم (صلی اللہ علیہ وآلہ وسلم) اور پہلی صف والے کھڑے ہوئے پھر آپ (صلی اللہ علیہ وآلہ وسلم) نے تکبیر کہی اور سب نے مل کر رکوع کیا پھر پچھلی صف آگے آگئی اور اگلی صف پیچھے چلی گئی یوں آگے والوں نے حضور اکرم (صلی اللہ علیہ وآلہ وسلم) کے ساتھ سجدہ کیا جیسا کہ پہلی مرتبہ آگے والوں نے کیا تھا ۔ نبی کریم (صلی اللہ علیہ وآلہ وسلم) نے عصر کی نماز قصر کر کے دو رکعتیں پڑھی ۔ (رواہ ابن جریر وابن المنذر وابن ابی حاتم وعبدالرزاق)