2420 ۔۔ جس نے قرآن پڑھا اور دن رات اس کی تلاوت کی۔ اس کے حلال کو حلال اور حرام کو حرام جانا۔ اللہ تعالیٰ قرآن اس کے گوشت پوست اور رگ و پئے میں بسا دیں گے۔ اور کاتبین، نیکو کار اور سردار فرشتوں کی رفاقت میسر فرمائیں گے۔ حتی کہ جب قیامت کا دن آئے گا تو یہ قرآن اس کے لیے حجت ہوگا۔ اور قرآن بارگاہ رب العزت میں کہے گا اے پروردگار ! ہر شخص دنیا میں عمل کرکے اپنی اجرت لیتا تھا سوائے اس شخص کے۔ یہ شب ور وز مجھ ہی میں مصروف رہتا تھا۔ میرے حلال کو حلال اور حرام کو حرام جانتا تھا۔ پس پروردگار ! اس کو نواز دیجیے۔ پھر اس شخص کو بادشاہی کا تاج پہنایا جائے گا اور عزت و کرامت کا حلہ زیب تن کیا جائے گا۔ اللہ تعالیٰ قرآن سے فرمائیں گے کیا اب تو راضی ہے ؟ وہ کہے گا پروردگار ! میں تو اس کے لیے اس سے زیادہ کا خواہشمند تھا۔ تب اللہ تعالیٰ پروانہ سلطنت اس کے دائیں اور پروانہ ابد الآباد بائیں ہاتھ میں مرحمت فرمائیں گے۔ پھر اللہ تعالیٰ قرآن سے فرمائیں گے کیا اب تو راضی ہے ؟ وہ کہے گا پروردگار ! جی پروردگار ! اب میں راضی ہوں۔ اور جو شخص اس قرآن کو سن رسیدگی کے بعد حاصل کرے گا اور اس میں اٹکے گا اللہ تعالیٰ اس کو دہرا اجر مرحمت فرمائیں۔ (شعب الایمان بروایت ابوہریرہ (رض))